"പ്രിയപ്പെട്ടവരെ... ഞാൻ 30.09.2026ൽ കൗൺസിലർ സ്ഥാനത്തു നിന്ന് സ്വകാര്യ കാരണങ്ങൾ കൊണ്ട് രാജിവെക്കുന്നതായി അറിയിച്ച് മേയർ ശ്രീ വി.വി. രാജേഷിന് കത്ത് നൽകിയിട്ടുണ്ട്. കത്തിന്റെ പകർപ്പ് ജില്ലാ കളക്ടർക്ക് തിങ്കളാഴ്ച സമർപ്പിക്കും. നിങ്ങൾ എനിക്ക് നൽകിയ എല്ലാ സ്നേഹത്തിനും സഹകരണത്തിനും അഗാധമായ നന്ദി അറിയിക്കുന്നു." - ശ്രീലേഖ സന്ദേശത്തിൽ വ്യക്തമാക്കി.
കേരളത്തിലേക്ക് കൂടുതൽ വിദേശ നിക്ഷേപങ്ങൾ എത്തിക്കുന്നതിനായി ദുബായ്, ലണ്ടൻ ഉൾപ്പെടെ അഞ്ച് പ്രധാന ആഗോള നഗരങ്ങളിൽ 'കേരള ഡെസ്കുകൾ' ആരംഭിക്കാൻ സർക്കാർ അനുമതി നൽകി.
നെടുമ്പാശ്ശേരി വിമാനത്താവളത്തിലെ സോളാർ പാനലുകളിൽ നിന്ന് ചെമ്പ് മോഷ്ടിച്ച കേസിൽ മൂന്ന് ഇതരസംസ്ഥാന തൊഴിലാളികൾ പിടിയിലായി. അസം സ്വദേശി ജലാൽ ഹുസൈൻ, ബ്രദക് സ്വദേശി ഗണേഷ് കുമാർ, ബംഗാൾ സ്വദേശി താജുദ്ദീൻ ഷെയ്ഖ് എന്നിവരെയാണ് നെടുമ്പാശ്ശേരി പൊലീസ് അറസ്റ്റ് ചെയ്തത്.
എസ്എഫ്ഐ ജില്ലാ സെക്രട്ടറിയെ ഭീഷണിപ്പെടുത്തിയ കന്റോൺമെന്റ് എസ്ഐയുടെ ശബ്ദരേഖ പുറത്തുവന്നതിനെ തുടർന്ന് എഡിജിപി അടിയന്തര അന്വേഷണത്തിന് ഉത്തരവിട്ടു. യൂണിവേഴ്സിറ്റി ഹോസ്റ്റലിലെ പൊലീസ് മർദ്ദനത്തിന് പിന്നാലെ ഉദ്യോഗസ്ഥരുടെ വീട്ടിലേക്ക് മാർച്ച് പ്രഖ്യാപിച്ചതിനെ തുടർന്നാണ് പാർട്ടി ഓഫീസിൽ കയറുമെന്ന് എസ്ഐ ഭീഷണിപ്പെടുത്തിയത്.
കോട്ടയം മെഡിക്കൽ കോളേജിൽ ഹെർണിയ ശസ്ത്രക്രിയക്ക് വിധേയയായ ചങ്ങനാശ്ശേരി സ്വദേശി ഹസീന മരിച്ച സംഭവത്തിൽ ചികിത്സാപിഴവ് ആരോപിച്ച് കുടുംബം പോലീസിൽ പരാതി നൽകി. എന്നാൽ ചികിത്സാപിഴവുണ്ടായിട്ടില്ലെന്നും ശസ്ത്രക്രിയയ്ക്കു ശേഷമുണ്ടായ അണുബാധയാണ് മരണകാരണമെന്നുമാണ് ആശുപത്രി അധികൃതരുടെ വിശദീകരണം.
മുട്ടിൽ മരംമുറിക്കേസിലെ ജയതിലകിന്റെ ഉത്തരവിനെക്കുറിച്ച് അന്വേഷിക്കുമെന്നും ഇതിന്റെ മറവിൽ വൻ കൊള്ളയും ഗൂഢാലോചനയുമാണ് നടന്നതെന്നും മന്ത്രി ഷിബു ബേബി ജോൺ കൊല്ലത്ത് പറഞ്ഞു. ബോർഡ്-കോർപ്പറേഷൻ നിയമനങ്ങൾ വൈകുന്നതിലുള്ള അമർഷവും ഉദ്ഘാടന മാമാങ്കങ്ങളോടുള്ള വിയോജിപ്പും അദ്ദേഹം വാർത്താസമ്മേളനത്തിൽ പങ്കുവെച്ചു.
സി.പി.എം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ ഫ്ലക്സ് ബോർഡ് കോൺഗ്രസിന്റേതെന്ന് തെറ്റിദ്ധരിച്ച് മാറി കീറിയതാണെന്ന് വ്യക്തമാക്കി യുവാവിന്റെ മാപ്പപേക്ഷ. കൊല്ലത്ത് എസ്.എഫ്.ഐ പ്രകടനത്തിനിടെ ഫ്ലക്സ് തകർത്ത സംഭവത്തിൽ കിളികൊല്ലൂർ സ്വദേശി അക്ബർ ഷായാണ് വിശദീകരണ വീഡിയോയുമായി രംഗത്തെത്തിയത്.
വിഴിഞ്ഞത്ത് ഒറ്റയ്ക്ക് താമസിക്കുന്ന വയോധികയുടെ വീടിൻ്റെ പിൻവാതിൽ തകർത്ത് നാല് പവൻ സ്വർണവും 25,000 രൂപയും കവർന്നു. തുറമുഖ നിർമാണ ശബ്ദമാണെന്ന് കരുതി രാത്രി കേട്ട ബഹളം ഗൃഹനാഥ ശ്രദ്ധിക്കാതിരുന്നതാണ് മോഷണത്തിന് വഴിവെച്ചത്.
കരുവന്നൂർ കള്ളപ്പണക്കേസിൽ രാഷ്ട്രീയ പ്രേരിതമായി പ്രതി ചേർത്തു എന്നാരോപിച്ച് കേസിൽ നിന്ന് ഒഴിവാക്കണമെന്ന് ആവശ്യപ്പെട്ട് സി.പി.എമ്മും മുതിർന്ന നേതാക്കളും വിടുതൽ ഹർജി നൽകി. പാർട്ടി ഓഫീസ് നിർമാണത്തിനും ഭൂമി വാങ്ങലിനും തട്ടിപ്പ് പണം ഉപയോഗിച്ചെന്ന ഇ.ഡി കണ്ടെത്തലിനെതിരെ നൽകിയ ഹർജി ഒക്ടോബർ 24-ന് കോടതി പരിഗണിക്കും.
