തിരുവനന്തപുരം കോര്‍പറേഷൻ ബിജെപി കൗൺസിലർ സ്ഥാനം രാജിവെച്ച് ആർ ശ്രീലേഖ

തിരുവനന്തപുരം: ബിജെപി നേതൃത്വവുമായുള്ള ഭിന്നത രൂക്ഷമായതിനെ തുടർന്ന് തിരുവനന്തപുരം കോർപറേഷൻ കൗൺസിലർ സ്ഥാനം രാജിവെച്ച് മുൻ ഡിജിപി ആർ. ശ്രീലേഖ. മേയർ സ്ഥാനം നൽകാത്തതിൽ കടുത്ത അതൃപ്തിയിലായിരുന്ന ശ്രീലേഖയുടെ രാജി, കോർപറേഷനിൽ വൻ മുന്നേറ്റം നടത്തിയ ബിജെപിക്ക് വലിയ തിരിച്ചടിയായി. ശ്രീലേഖയുടെ രാജിയോടെ കോർപറേഷനിൽ ബിജെപിയുടെ കൗൺസിലർമാരുടെ എണ്ണം 49 ആയി ചുരുങ്ങി.

സ്വകാര്യ കാരണങ്ങളാലാണ് രാജിയെന്നാണ് ശ്രീലേഖയുടെ ഔദ്യോഗിക വിശദീകരണം. വാർഡ് വാട്സ്ആപ്പ് ഗ്രൂപ്പിൽ പങ്കുവെച്ച സന്ദേശത്തിലാണ് രാജിവിവരം അറിയിച്ചത്.

അതേസമയം, ശ്രീലേഖയുടെ രാജി സംബന്ധിച്ച വിവരങ്ങൾ മാധ്യമങ്ങളിലൂടെയാണ് അറിഞ്ഞതെന്ന് ഡെപ്യൂട്ടി മേയർ ആശാനാഥ് പ്രതികരിച്ചു. പാർട്ടി നേതൃത്വവും ശ്രീലേഖയും തമ്മിൽ നിലനിന്നിരുന്ന അഭിപ്രായവ്യത്യാസങ്ങളാണ് അപ്രതീക്ഷിത രാജിയിലേക്ക് നയിച്ചതെന്നാണ് വിവരങ്ങൾ.