ലോക്കപ്പില്ലാത്ത പുളിക്കീഴ് പൊലീസ് സ്റ്റേഷനിൽ തറയിലെ കൊളുത്ത് ഇളക്കി പോക്സോ പ്രതി ചാടിപ്പോയി; തെരച്ചിൽ ഊർജ്ജിതം

പത്തനംതിട്ട: പുളിക്കീഴ് പൊലീസ് സ്റ്റേഷനിൽ നിന്ന് പോക്സോ കേസ് പ്രതി പൊലീസ് കസ്റ്റഡിയിൽ നിന്ന് രക്ഷപ്പെട്ടു. ഇന്നലെ രാത്രിയോടെയാണ് വ്യാപക സുരക്ഷാ വീഴ്ചയ്ക്ക് വഴിയുവെച്ച സംഭവം അരങ്ങേറിയത്. സ്റ്റേഷനിൽ സുരക്ഷിതമായ ലോക്കപ്പ് സൗകര്യമില്ലാത്തതിനെ തുടർന്ന് തറയിലെ കൊളുത്തിൽ ബന്ധിച്ചിരുന്ന പ്രതി, അത് ഇളക്കിമാറ്റിയാണ് കടന്നുകളഞ്ഞത്.

അടിസ്ഥാന സൗകര്യങ്ങൾ പോലുമില്ലാത്ത തിരുവല്ല ഷുഗർ ഫാക്ടറിയുടെ പഴയ കെട്ടിടത്തിലാണ് കാലങ്ങളായി പുളിക്കീഴ് പൊലീസ് സ്റ്റേഷൻ പ്രവർത്തിക്കുന്നത്. സ്റ്റേഷനിൽ തടവുകാരെ പാർപ്പിക്കാൻ സെൽ ഇല്ലാത്തതിനാൽ തറയിൽ ഉറപ്പിച്ചിരിക്കുന്ന കൊളുത്തിൽ കൈവിലങ്ങുമായാണ് പ്രതികളെ ഇവിടെ സാധാരണയായി നിർത്തിയിരുന്നത്. ഈ കൊളുത്ത് ബലമായി ഇളക്കി മാറ്റിയാണ് പ്രതി രക്ഷപ്പെട്ടത്.

പീഡനത്തിനിരയായ കുട്ടിയെ വൈദ്യപരിശോധനയ്ക്ക് കൊണ്ടുപോയ സമയത്താണ് പ്രതിയെ സ്റ്റേഷനിൽ കസ്റ്റഡിയിൽ വെച്ചിരുന്നത്. പാറാവ് ഡ്യൂട്ടിയിലുണ്ടായിരുന്ന പൊലീസുകാരൻ പിന്നാലെ ഓടിയെങ്കിലും പ്രതിയെ പിടികൂടാനായില്ല.

സംഭവത്തെ തുടർന്ന് പ്രദേശത്ത് പൊലീസ് തിരച്ചിൽ ഊർജിതമാക്കിയിട്ടുണ്ട്. പ്രതി ആറ്റിലൂടെയാണോ രക്ഷപ്പെട്ടതെന്ന് പൊലീസ് സംശയിക്കുന്നുണ്ട്; സംഭവസ്ഥലത്തിന് സമീപത്തുനിന്ന് ഒരു വള്ളം കാണാതായിട്ടുമുണ്ട്. പ്രതിയുടെ ഭാര്യവീട് കണ്ണൂരായതിനാൽ അവിടേക്കും പ്രത്യേക അന്വേഷണ സംഘം തിരിച്ചിട്ടുണ്ട്. ബന്ധുവായ കുട്ടിയെ പീഡിപ്പിച്ച കേസിലാണ് ഇയാൾ പിടിയിലായത്.

അതേസമയം, അടിസ്ഥാന സൗകര്യങ്ങളില്ലാത്ത കെട്ടിടത്തിൽ പൊലീസ് സ്റ്റേഷൻ പ്രവർത്തിക്കുന്നതിലെ ഗുരുതരമായ സുരക്ഷാ ഭീഷണിയാണ് ഈ സംഭവത്തോടെ വീണ്ടും ചർച്ചയായിരിക്കുന്നത്.