ഹരിപ്പാട് സ്റ്റാൻഡിൽ നിന്ന് റോഡിലേക്ക് ഇറങ്ങിയ കെഎസ്ആർടിസി ബസിൽ ബുള്ളറ്റ് ഇടിച്ചു, യുവാവിന് ദാരുണാന്ത്യം

ഹരിപ്പാട്: കെഎസ്ആർടിസി ബസ് സ്റ്റാൻഡിൽ നിന്ന് റോഡിലേക്ക് ഇറങ്ങിയ ബസിലിടിച്ച് ബൈക്ക് യാത്രികനായ യുവാവ് ദാരുണമായി മരിച്ചു. കുമാരപുരം താമല്ലാക്കൽ കണ്ടത്തിൽ കിഴക്കതിൽ രാജേന്ദ്രൻ - മായ ദമ്പതികളുടെ മകൻ അഞ്ചിത്ത് (24) ആണ് മരിച്ചത്. നങ്ങ്യാർകുളങ്ങരയിൽ നിന്ന് വീട്ടിലേക്ക് മടങ്ങുകയായിരുന്നു അദ്ദേഹം.

ഞായറാഴ്ച വൈകിട്ട് 3.30-നായിരുന്നു അപകടം. ഹരിപ്പാട് കെഎസ്ആർടിസി ബസ് സ്റ്റാൻഡിൽ നിന്ന് റോഡിലേക്ക് ഇറങ്ങിയ ബസിലേക്ക് അഞ്ചിത്ത് സഞ്ചരിച്ച റോയൽ എൻഫീൽഡ് ബുള്ളറ്റ് ഇടിക്കുകയായിരുന്നു.

അപകടത്തിൽ ഗുരുതരമായി പരിക്കേറ്റ അഞ്ചിത്തിനെ ഉടൻതന്നെ ഹരിപ്പാട് താലൂക്ക് ആശുപത്രിയിലും പിന്നീട് വണ്ടാനം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. നില ഗുരുതരമായതിനെ തുടർന്ന് പരുമലയിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലിരിക്കെ തിങ്കളാഴ്ച പുലർച്ചെ 5.30-ഓടെയാണ് അന്ത്യം സംഭവിച്ചത്.

അഞ്ജിതയാണ് സഹോദരി. മൃതദേഹത്തിന്റെ സംസ്കാരം ചൊവ്വാഴ്ച രാവിലെ 11-ന് നടക്കും.