മുഖ്യമന്ത്രി സതീശൻ പറഞ്ഞത് പച്ചനുണ', എസ്ഐആറിനെതിരെ സിപിഎം പരാതി നൽകിയിരുന്നുവെന്ന് എംവി ജയരാജൻ; പ്രതിഷേധങ്ങളെ കേന്ദ്രവും സംസ്ഥാനവും അടിച്ചമർത്തുന്നു

​കാസർകോട്: വോട്ടർ പട്ടികയിലെ വീഴ്ചകൾ ചൂണ്ടിക്കാട്ടി എസ്.ഐ.ആറിനെതിരെ (SIR) കഴിഞ്ഞ തെരഞ്ഞെടുപ്പ് കാലത്ത് സി.പി.എം പരാതി നൽകിയിരുന്നില്ലെന്ന പ്രതിപക്ഷ നേതാവ് വി.ഡി. സതീശന്റെ അവകാശവാദം പച്ചനുണയാണെന്ന് സി.പി.എം സംസ്ഥാന സെക്രട്ടറിയേറ്റ് അംഗം എം.വി. ജയരാജൻ. ജനാധിപത്യ കശാപ്പിനെ ന്യായീകരിക്കാനാണ് സതീശൻ ശ്രമിക്കുന്നതെന്നും കാസർകോട് വാർത്താസമ്മേളനത്തിൽ അദ്ദേഹം ആരോപിച്ചു.

​വോട്ടർ പട്ടികയിൽനിന്ന് ന്യൂനപക്ഷ, സ്ത്രീ, ദളിത് വോട്ടർമാരെ കൂട്ടത്തോടെ ഒഴിവാക്കുകയും എന്യുമറേഷൻ ഫോം കൃത്യമായി വിതരണം ചെയ്യാതിരിക്കുകയും ചെയ്തതടക്കം വ്യാപക ക്രമക്കേടുകളാണ് നടന്നത്. വിഷയം ചൂണ്ടിക്കാട്ടി അന്നത്തെ മുഖ്യ തെരഞ്ഞെടുപ്പ് ഓഫീസർക്ക് സി.പി.എം ഒരു ഡസനോളം പരാതികൾ രേഖാമൂലം നൽകിയിരുന്നു. സംസ്ഥാന, കേന്ദ്ര തെരഞ്ഞെടുപ്പ് കമീഷനുകളുടെ കണക്കുകളിൽ വലിയ വൈരുധ്യങ്ങളാണുണ്ടായിരുന്നതെന്നും അദ്ദേഹം പറഞ്ഞു.

​പ്രതിഷേധങ്ങളെ കേന്ദ്രവും സംസ്ഥാനവും അടിച്ചമർത്തുന്നു

​വോട്ടുകൾ തള്ളുന്നതിനും പുതിയവ ഉൾപ്പെടുത്തുന്നതിനുമായി നൽകിയ അപേക്ഷകളിൽ വലിയ ക്രമക്കേടുകൾ നടത്തുകയും വ്യാജ വോട്ടർമാരെ തിരുകിക്കയറ്റുകയും ചെയ്തിട്ടുണ്ട്. സംഭവത്തിൽ മുഖ്യ തെരഞ്ഞെടുപ്പ് കമീഷനെപ്പോലെ തന്നെ മുഖ്യമന്ത്രിയുടെ നിലവിലെ പ്രിൻസിപ്പൽ സെക്രട്ടറി രത്തൻ ഖേൽക്കർക്കും തുല്യ ഉത്തരവാദിത്തമുണ്ട്.

​തെരഞ്ഞെടുപ്പ് കമീഷന്റെ വീഴ്ചകൾക്കെതിരെ ഉയർന്നുവരുന്ന ജനകീയ പ്രതിഷേധങ്ങളെ കേന്ദ്രത്തിൽ ബി.ജെ.പിയും സംസ്ഥാനത്ത് യു.ഡി.എഫും ഒരുപോലെ അടിച്ചമർത്താനാണ് ശ്രമിക്കുന്നതെന്നും എം.വി. ജയരാജൻ കുറ്റപ്പെടുത്തി.