'വടിവാളിന് വെട്ടി റെഡിയാക്കും'; ആലപ്പുഴയില്‍ നാട്ടുകാരെ ഭീതിയിലാഴ്‌ത്തി ലഹരിസംഘത്തിന്‍റെ അഴിഞ്ഞാട്ടം

ചെങ്ങന്നൂർ: തിരുവൻവണ്ടൂരിൽ നാട്ടുകാരെ ഭീതിയിലാഴ്ത്തി ലഹരി സംഘത്തിന്റെ വിളയാട്ടം. മദ്യലഹരിയിലെത്തിയ സംഘത്തിന്റെ ഭീകരാന്തരീക്ഷത്തിൽ പൊറുതിമുട്ടിയ നാട്ടുകാർ ഒടുവിൽ സംഘടിച്ചെത്തിയാണ് പൊലീസിന്റെ സഹായത്തോടെ പ്രതികളെ പിടികൂടിയത്. സംഭവവുമായി ബന്ധപ്പെട്ട് മൂന്ന് പേരെ പൊലീസ് കസ്റ്റഡിയിലെടുത്തു. ഒരാൾ കൂടി പിടിയിലാകാനുണ്ടെന്നാണ് വിവരം.

ഇന്നലെ ഉച്ചയോടെയാണ് സംഭവങ്ങളുടെ തുടക്കം. മദ്യലഹരിയിൽ അമിതവേഗത്തിൽ കാറോടിച്ചെത്തിയ സംഘം പ്രദേശത്തെ ഇലക്ട്രിക് പോസ്റ്റ് ഇടിച്ചു തകർത്തു. ഇത് ചോദ്യം ചെയ്ത നാട്ടുകാരെയും വഴിയാത്രക്കാരെയും ഇവർ അസഭ്യം പറയുകയും ചെയ്തു. സംഘത്തിൽ ഒരാളെ നാട്ടുകാർ ചേർന്ന് പിടികൂടി പൊലീസിൽ ഏൽപ്പിച്ചെങ്കിലും, രാത്രിയോടെ കൂടുതൽ പേരുമായി തിരിച്ചെത്തിയ സംഘം വീണ്ടും പ്രദേശത്ത് ഭീകരാന്തരീക്ഷം സൃഷ്ടിക്കുകയായിരുന്നു.

"വടിവാളിന് വെട്ടി റെഡിയാക്കും" എന്ന് പരസ്യമായി ഭീഷണിപ്പെടുത്തുന്ന ലഹരി സംഘത്തിന്റെ ദൃശ്യങ്ങൾ പുറത്തുവന്നിട്ടുണ്ട്. രാത്രി വീണ്ടുമെത്തിയ സംഘം ഭീതി പരത്തിയതോടെ നാട്ടുകാർ കൂട്ടത്തോടെ രംഗത്തിറങ്ങി. തുടർന്ന് നടത്തിയ തെരച്ചിലിലാണ് ഓതറയിൽ നിന്നും ചെങ്ങന്നൂർ നഗരത്തിലെ ബാറിൽ നിന്നുമായി പ്രതികളെ പൊലീസ് പിടികൂടിയത്. സംഭവത്തിൽ ഉൾപ്പെട്ട ഒരുകൂടി പ്രതിക്കായുള്ള തെരച്ചിൽ പൊലീസ് ഊർജിതമാക്കിയിട്ടുണ്ട്.