തത്സമയ ലൈവ് സ്ട്രീം ദൃശ്യങ്ങളിലൂടെയും സോഷ്യൽ മീഡിയ കൂട്ടായ്മകളിലൂടെയും ലോകമെമ്പാടുമുള്ള ദശലക്ഷക്കണക്കിന് ആളുകളുടെ മനംകവർന്ന ‘ജാക്കി’ എന്ന ബാൾഡ് ഈഗിൾ (അമേരിക്കൻ പരുന്ത്) വിടവാങ്ങി. 14-ാം വയസ്സിലാണ് അന്ത്യം. ആഴ്ചകൾ നീണ്ട ചികിത്സയ്ക്കൊടുവിൽ തിങ്കളാഴ്ച പുലർച്ചെയോടെയായിരുന്നു അന്ത്യമെന്ന് ഒജായ് റാപ്റ്റർ സെന്റർ അറിയിച്ചു. പ്രിയസഖിയുടെ വേർപാടോടെ എട്ട് വർഷത്തെ പങ്കാളിയായ 12 വയസ്സുകാരൻ ‘ഷാഡോ’ ഒറ്റയ്ക്കായി.
കാലിഫോർണിയയിലെ ബിഗ് ബെയർ തടാകക്കരയിലുള്ള പൈൻ മരത്തിന് മുകളിലെ കൂടായിരുന്നു ജാക്കിയുടെയും ഷാഡോയുടെയും താവളം. ജൂലൈ പകുതിയോടെ രണ്ട് കഴുകന്മാരുമായി നടന്ന ഏറ്റുമുട്ടലിന് പിന്നാലെയാണ് ജാക്കിക്ക് ഗുരുതരമായി പരിക്കേറ്റത്. തടാകത്തിന് സമീപം പറക്കാൻ കഴിയാതെ തളർന്നുവീണ നിലയിൽ കണ്ടെത്തിയ പരുന്തിനെ ഉടൻ തന്നെ ഒജായ് റാപ്റ്റർ സെന്ററിലേക്ക് മാറ്റി വിദഗ്ധ ചികിത്സ ലഭ്യമാക്കുകയായിരുന്നു.
കടുത്ത രക്തക്കുറവ് അനുഭവപ്പെട്ടതിനെ തുടർന്ന് മറ്റൊരു കഴുകനിൽ നിന്ന് രക്തം മാറ്റിവെക്കൽ (Blood transfusion) ഉൾപ്പെടെയുള്ള തീവ്ര പരിചരണം നൽകിയെങ്കിലും ആരോഗ്യം വീണ്ടെടുക്കാനായില്ല. ഒജായ് റാപ്റ്റർ സെന്ററാണ് ഇൻസ്റ്റഗ്രാമിലൂടെ മരണവിവരം പങ്കുവെച്ചത്.
ഇന്റർനെറ്റിലെ താരജോഡികൾ
2015-ൽ ‘ഫ്രണ്ട്സ് ഓഫ് ബിഗ് ബെയർ വാലി’ എന്ന പരിസ്ഥിതി സംഘടന ഈ പരുന്തുകളുടെ കൂട്ടിൽ ലൈവ് വെബ്ക്യാം സ്ഥാപിച്ചതോടെയാണ് ജാക്കി ആഗോളതലത്തിൽ ശ്രദ്ധനേടുന്നത്. 2018-ൽ ഷാഡോ എന്ന ആൺ കഴുകൻ കൂട്ടിലേക്ക് എത്തിയതോടെ ഇരുവരും ഇന്റർനെറ്റിലെ പ്രിയപ്പെട്ട താരജോഡികളായി മാറി. കൊടുങ്കാറ്റും അതിശൈത്യവും വകവെക്കാതെ മുട്ടകൾക്ക് അടയിരിക്കുന്നതും കുഞ്ഞുങ്ങളെ സംരക്ഷിക്കുന്നതുമെല്ലാം തത്സമയം വീക്ഷിക്കാൻ ലക്ഷക്കണക്കിന് ആളുകളാണ് ദിവസവും വെബ്ക്യാമിൽ കണ്ണുനട്ടിരുന്നത്.
അടുത്തിടെയാണ് ഇവരുടെ കുഞ്ഞുങ്ങളായ സാൻഡിയും ലൂണയും കൂടുവിട്ട് സ്വന്തം പറക്കൽ ആരംഭിച്ചത്. അതിന് പിന്നാലെയുണ്ടായ ജാക്കിയുടെ വേർപാട് ഷാഡോയെ തനിച്ചാക്കിയതി
