2019-ന് ശേഷം ആദ്യം: കെഎസ്ആർടിസി ജീവനക്കാർക്കും പെൻഷൻകാർക്കും ഓണം ആനുകൂല്യങ്ങൾ പ്രഖ്യാപിച്ചു
തിരുവനന്തപുരം: വർഷങ്ങളുടെ ഇടവേളയ്ക്ക് ശേഷം കെഎസ്ആർടിസി ജീവനക്കാർക്കും പെൻഷൻകാർക്കും ഓണം ആനുകൂല്യങ്ങൾ അനുവദിച്ച് സംസ്ഥാന സർക്കാർ. ആനുകൂല്യങ്ങളും ഉത്സവബത്തയും വിതരണം ചെയ്യുന്നതിനായി ധനവകുപ്പ് 33.92 കോടി രൂപ അനുവദിച്ചു. 2019-ന് ശേഷം ആദ്യമായാണ് കെഎസ്ആർടിസി പെൻഷൻകാർക്ക് ഓണം ഉത്സവബത്ത ലഭ്യമാകുന്നത്.
പ്രഖ്യാപിച്ച പ്രധാന ആനുകൂല്യങ്ങൾ:
- സ്ഥിരം ജീവനക്കാർ: 10,000 രൂപ ശമ്പള അഡ്വാൻസും 3,000 രൂപ ഉത്സവബത്തയും ലഭിക്കും. അർഹരായവർക്ക് ബോണസും അനുവദിക്കും.
- താൽക്കാലിക ജീവനക്കാർ: 1,000 രൂപ ഉത്സവബത്ത ലഭിക്കും.
- പെൻഷൻകാർ: 1,250 രൂപയാണ് ഓണം ഉത്സവബത്തയായി നിശ്ചയിച്ചിരിക്കുന്നത്. KSRTC-SWIFT
2023 മുതൽ മുടങ്ങിക്കിടന്ന ഓണം ശമ്പള അഡ്വാൻസും ഇത്തവണ പുനഃസ്ഥാപിച്ചിട്ടുണ്ട്. ബോണസിന് അർഹതയില്ലാത്ത ജീവനക്കാർക്ക് ഫെസ്റ്റിവൽ അലവൻസോ ശമ്പള അഡ്വാൻസോ ലഭിക്കും. അനുവദിച്ച തുക ഉപയോഗിച്ച് ഓണത്തിന് മുന്നോടിയായി ജീവനക്കാരുടെ ശമ്പളവും പെൻഷൻ കുടിശ്ശികയുടെ ഒരു ഭാഗവും നൽകും. ഗഡുക്കളായി നൽകാറുള്ള ശമ്പളം ഓണക്കാലത്ത് ഒറ്റത്തവണയായി അക്കൗണ്ടിലെത്തിക്കാനാണ് മാനേജ്മെന്റ് തീരുമാനം.
ഓണക്കാലത്തെ യാത്രാത്തിരക്ക് കണക്കിലെടുത്ത് ബംഗളൂരു, ചെന്നൈ തുടങ്ങിയ അന്തർസംസ്ഥാന റൂട്ടുകളിലേക്കും പ്രധാന അന്തർജില്ലാ റൂട്ടുകളിലേക്കും കൂടുതൽ പ്രത്യേക സർവീസുകൾ ഏർപ്പെടുത്തുമെന്ന് കെഎസ്ആർടിസി അറിയിച്ചു. യാത്രക്കാർക്ക് Online KSRTC SWIFT Reservation Portal വഴിയോ ‘എന്റെ കെഎസ്ആർടിസി’ മൊബൈൽ ആപ്പ് വഴിയോ ടിക്കറ്റുകൾ മുൻകൂട്ടി റിസർവ് ചെയ്യാം.
KSRTC-SWIFT
