സുകുമാരൻ നായരെ വേട്ടയാടുന്നത് നീചം; പുതുപ്പള്ളിയോട് അവഗണന തുടർന്നാൽ സമരമെന്ന് ചാണ്ടി ഉമ്മൻ
കോട്ടയം: എൻഎസ്എസ് ജനറൽ സെക്രട്ടറി ജി. സുകുമാരൻ നായർക്കെതിരായ സൈബർ ആക്രമണങ്ങളിലും വിമർശനങ്ങളിലും രൂക്ഷമായ പ്രതികരണവുമായി ചാണ്ടി ഉമ്മൻ എംഎൽഎ. സുകുമാരൻ നായർ കേരളത്തിന്റെ പൊതുസ്വത്താണെന്നും അദ്ദേഹത്തെ മനഃപൂർവം വേട്ടയാടാൻ നീചമായ ശ്രമമാണ് നടക്കുന്നതെന്നും ചാണ്ടി ഉമ്മൻ പറഞ്ഞു. മുൻപ് തന്റെ പിതാവ് ഉമ്മൻ ചാണ്ടിയെയും ഇതേ രീതിയിൽ ചിലർ വേട്ടയാടിയിരുന്നതായി അദ്ദേഹം അനുസ്മരിച്ചു.
ഉമ്മൻ ചാണ്ടിക്ക് എൻഎസ്എസുമായുണ്ടായിരുന്ന ഊഷ്മളമായ ആത്മബന്ധം താനും കാത്തുസൂക്ഷിക്കുന്നുണ്ടെന്ന് ചാണ്ടി ഉമ്മൻ വ്യക്തമാക്കി. കെ.ബി. ഗണേഷ് കുമാറിന്റെ രാഷ്ട്രീയ ശൈലിയെക്കുറിച്ച് പ്രതികരിക്കാനില്ലെന്നും എന്നാൽ തന്നെ കാണാനെത്തുന്നവരോട് മാന്യമായി മാത്രം പെരുമാറുന്ന വ്യക്തിത്വമാണ് സുകുമാരൻ നായരുടേതെന്നും അദ്ദേഹം കൂട്ടിച്ചേർത്തു.
കെപിസിസി അധ്യക്ഷ സ്ഥാനവുമായി ബന്ധപ്പെട്ട ചർച്ചകളിലും അദ്ദേഹം നിലപാട് വ്യക്തമാക്കി. എംപിമാർക്കും എംഎൽഎമാർക്കും കെപിസിസി പ്രസിഡന്റാകുന്നതിന് യാതൊരുവിധ അയോഗ്യതയുമില്ലെന്നും കെ. സുധാകരൻ എംപിയായിരിക്കെയാണ് ആ പദവി വഹിച്ചിരുന്നതെന്നും അദ്ദേഹം ഓർമ്മിപ്പിച്ചു.
പുതുപ്പള്ളിയിലെ റോഡ് വികസനം: സമര മുന്നറിയിപ്പ്
മണ്ഡലത്തിലെ വികസന മുരടിപ്പിലും തകർന്ന റോഡുകളുടെ കാര്യത്തിലും സംസ്ഥാന സർക്കാരിനെതിരെ ചാണ്ടി ഉമ്മൻ രൂക്ഷവിമർശനം ഉന്നയിച്ചു. ഇടതുപക്ഷം ഏറ്റവും കൂടുതൽ വികസന അവഗണന കാട്ടിയ മണ്ഡലമാണ് പുതുപ്പള്ളിയെന്ന് അദ്ദേഹം ആരോപിച്ചു. ഭരണത്തിൽ മാറ്റങ്ങൾ വന്നിട്ടും ഉദ്യോഗസ്ഥരുടെ നിഷേധാത്മക സമീപനത്തിൽ മാറ്റമില്ലെന്നും റോഡുകളുടെ അറ്റകുറ്റപ്പണി സംബന്ധിച്ച് മന്ത്രിക്ക് പരാതി നൽകിയിട്ടുണ്ടെന്നും അദ്ദേഹം വ്യക്തമാക്കി. ഉദ്യോഗസ്ഥർ ആവശ്യപ്പെട്ടതുപോലെ മൂന്ന് മാസം കൂടി കാത്തിരിക്കുമെന്നും അതിനകം പണികൾ പൂർത്തിയായില്ലെങ്കിൽ പ്രത്യക്ഷ സമരരംഗത്തിറങ്ങുമെന്നും ചാണ്ടി ഉമ്മൻ മുന്നറിയിപ്പ് നൽകി.
