ന്യൂഡൽഹി: പുതിയ നിരവധി മോഡലുകൾ വിപണിയിലെത്തിയിട്ടും ഇന്ത്യക്കാരുടെ പ്രിയപ്പെട്ട ഇരുചക്രവാഹന ബ്രാൻഡായ റോയൽ എൻഫീൽഡിന്റെ ജനപ്രീതിയിൽ കുറവില്ല. 2026 ജൂണിലെ ഏറ്റവും പുതിയ വിൽപ്പന കണക്കുകൾ പ്രകാരം ക്ലാസിക് 350 (Classic 350) കമ്പനിയുടെ ഏറ്റവും കൂടുതൽ വിറ്റഴിക്കപ്പെടുന്ന മോട്ടോർസൈക്കിളായി സ്ഥാനം നിലനിർത്തി.
കഴിഞ്ഞ മാസം മാത്രം 40,660 യൂണിറ്റ് ക്ലാസിക് 350 മോട്ടോർസൈക്കിളുകളാണ് വിറ്റഴിഞ്ഞത്. 2025 ജൂണിലെ 29,172 യൂണിറ്റുകളുമായി താരതമ്യം ചെയ്യുമ്പോൾ മോഡലിന്റെ വിൽപ്പനയിൽ 39 ശതമാനത്തിന്റെ ശക്തമായ വാർഷിക വളർച്ചയാണ് രേഖപ്പെടുത്തിയത്.
350 സിസി വിഭാഗത്തിൽ വൻ മുന്നേറ്റം
വിൽപ്പനപ്പട്ടികയിൽ രണ്ടാം സ്ഥാനത്തുള്ള ബുള്ളറ്റ് 350 (Bullet 350), 26,488 യൂണിറ്റുകൾ വിറ്റഴിച്ച് 54 ശതമാനം വളർച്ച നേടി. 20,289 യൂണിറ്റുകൾ വിറ്റ അണ്ടർ 350 (Hunter 350) മൂന്നാം സ്ഥാനത്തും, 10,941 യൂണിറ്റുകൾ വിറ്റ മെറ്റിയർ 350 (Meteor 350) നാലാം സ്ഥാനത്തുമെത്തി. മെറ്റിയർ 45 ശതമാനവും ഹണ്ടർ 24 ശതമാനവും വാർഷിക വളർച്ചയാണ് കൈവരിച്ചത്.
ഉയർന്ന സിസി മോഡലുകൾക്ക് സമ്മിശ്ര പ്രകടനം
ചെറിയ എഞ്ചിൻ ശേഷിയുള്ള മോഡലുകൾ വൻ കുതിപ്പ് നടത്തിയപ്പോൾ, ഉയർന്ന ശേഷിയുള്ള മോഡലുകളുടെ പ്രകടനത്തിൽ ഇടിവ് പ്രകടമാണ്. 650 ട്വിൻ ശ്രേണിയുടെ വിൽപ്പന 23 ശതമാനം ഇടിഞ്ഞ് 2,238 യൂണിറ്റുകളിലെത്തി. ഹിമാലയൻ 39 ശതമാനം ഇടിവോടെ 1,240 യൂണിറ്റുകളിലേക്ക് ചുരുങ്ങി. അതേസമയം പുതുതായി അവതരിപ്പിച്ച ഗറില്ല 450 (Guerrilla 450) മികച്ച പ്രകടനം കാഴ്ചവെച്ചു; 944 യൂണിറ്റുകൾ വിറ്റ ഈ മോഡൽ 35 ശതമാനം വളർച്ച കൈവരിച്ചു.
പ്രീമിയം ക്രൂസർ വിഭാഗത്തിൽ സൂപ്പർ മെറ്റിയർ (98 യൂണിറ്റുകൾ), ഷോട്ട്ഗൺ (32 യൂണിറ്റുകൾ) എന്നിവ യഥാക്രമം 90%, 86% എന്ന തോതിൽ വലിയ വിൽപ്പന ഇടിവാണ് നേരിട്ടത്.
മൊത്തം വിൽപ്പനയിൽ വൻ കുതിപ്പ്
ചില മോഡലുകൾക്ക് തിരിച്ചടി നേരിട്ടെങ്കിലും മൊത്തത്തിൽ കമ്പനിക്ക് മികച്ച മാസമായിരുന്നു കഴിഞ്ഞുപോയത്. 2026 ജൂണിൽ ആകെ 1,02,930 മോട്ടോർസൈക്കിളുകളാണ് റോയൽ എൻഫീൽഡ് വിറ്റഴിച്ചത്. കഴിഞ്ഞ വർഷം ഇതേ കാലയളവിൽ വിറ്റ 76,957 യൂണിറ്റുകളെ അപേക്ഷിച്ച് 33 ശതമാനത്തിന്റെ വൻ വളർച്ചയാണിത്. പുതിയ സാങ്കേതികവിദ്യകളും ഡിസൈനുകളും വരുമ്പോഴും പരമ്പരാഗത മോഡലുകളായ ക്ലാസിക്, ബുള്ളറ്റ് എന്നിവയോടുള്ള ഉപഭോക്തൃ വിശ്വാസം തുടരുന്നു എന്നാണ് ഈ കണക്കുകൾ വ്യക്തമാക്കുന്നത്.
