മുംബൈ: തന്റെ കരിയറിലെ ഏറ്റവും ശ്രദ്ധേയമായ ‘മിമി’ എന്ന ബോളിവുഡ് ചിത്രം റിലീസ് ചെയ്ത് അഞ്ച് വർഷം പൂർത്തിയാകുന്നതിന്റെ സന്തോഷം ആരാധകരുമായി പങ്കുവെച്ച് നടി കൃതി സനോൺ. പ്രേക്ഷകരുടെയും നിരൂപകരുടെയും പ്രശംസ പിടിച്ചുപറ്റിയ ചിത്രത്തിന്റെ വാർഷികത്തോടനുബന്ധിച്ച് ആരാധകർ ഒരുക്കിയ പ്രത്യേക വീഡിയോ എഡിറ്റുകളും ചിത്രങ്ങളും താരം തന്റെ സോഷ്യൽ മീഡിയ അക്കൗണ്ടിലൂടെ പങ്കുവെച്ചു.
ചിത്രത്തിലെ വൈകാരികവും ഹാസ്യപരവുമായ മുഹൂർത്തങ്ങൾ കോർത്തിണക്കിയ കൊളാഷും ആരാധകരുടെ ആശംസകളും കൃതി ഇൻസ്റ്റഗ്രാം സ്റ്റോറിയായി പങ്കുവെച്ചിട്ടുണ്ട്. “ചിരിയുടെയും കണ്ണീരിന്റെയും കരുത്തിന്റെയും പ്രചോദനത്തിന്റെയും അഞ്ച് വർഷങ്ങൾ. ‘മിമി’ എപ്പോഴും ഞങ്ങളുടെ ഹൃദയത്തിലുണ്ടാകും” എന്നായിരുന്നു ആരാധകർ കുറിച്ചത്. കൂടാതെ, ചിത്രത്തിലെ മികച്ച പ്രകടനത്തിന് ദേശീയ അവാർഡ് സ്വീകരിക്കാൻ വേദിയിലേക്ക് നടക്കുന്ന വീഡിയോ പങ്കുവെച്ച താരം “മിമിക്ക് 5 വർഷം, എല്ലാ സ്നേഹത്തിനും നന്ദി” എന്നും കുറിച്ചു.
2021 ജൂലൈ 27-നാണ് ലക്ഷ്മൺ ഉതേക്കർ സംവിധാനം ചെയ്ത ‘മിമി’ പ്രേക്ഷകരിലേക്ക് എത്തിയത്. വാടകഗർഭപാത്രത്തിലൂടെ (Surrogacy) അമ്മയാകാൻ നിർബന്ധിതയാകുന്ന പെൺകുട്ടിയുടെ കഥ പറഞ്ഞ ചിത്രത്തിൽ ‘മിമി’ എന്ന കേന്ദ്രകഥാപാത്രത്തെയാണ് കൃതി അവതരിപ്പിച്ചത്. പങ്കജ് ത്രിപാഠി, സായ് തമാങ്കർ, മനോജ് പഹ്വ, സുപ്രിയ പഥക് എന്നിവരായിരുന്നു മറ്റ് പ്രധാന താരങ്ങൾ.
69-ാമത് ദേശീയ ചലച്ചിത്ര പുരസ്കാരത്തിൽ ചിത്രത്തിലെ മികച്ച പ്രകടനത്തിന് കൃതി സനോൺ മികച്ച നടിക്കുള്ള ദേശീയ പുരസ്കാരം സ്വന്തമാക്കിയിരുന്നു. ചിത്രത്തിലെ പ്രകടനത്തിന് പങ്കജ് ത്രിപാഠി മികച്ച സഹനടനുള്ള പുരസ്കാരവും നേടി.
ഷാഹിദ് കപൂറും രശ്മിക മന്ദാനയും ഒന്നിച്ചെത്തിയ ‘കോക്ടെയിൽ 2’ ആണ് കൃതിയുടേതായി ഏറ്റവും ഒടുവിൽ തിയേറ്ററുകളിലെത്തിയ ചിത്രം. 2012-ൽ പുറത്തിറങ്ങിയ സൂപ്പർഹിറ്റ് ചിത്രം ‘കോക്ടെയിലി’ന്റെ സ്പിരിച്വൽ സീക്വലായാണ് ഈ ചിത്രം ഒരുക്കിയത്.
