“നിങ്ങളുടെ ഈ പെരുമാറ്റം അങ്ങേയറ്റം അപലപനീയമാണ്. സ്ത്രീകൾ അപേക്ഷകളുമായി എത്തുമ്പോഴെങ്കിലും മാന്യമായ വസ്ത്രധാരണ രീതി പാലിക്കാനുള്ള മര്യാദ കാണിക്കണം.” – ഡൽഹി നിയമസഭയിൽ മുഖ്യമന്ത്രി രേഖ ഗുപ്ത
ന്യൂഡൽഹി: മണ്ഡലത്തിലെ ജനങ്ങളുടെ അപേക്ഷകൾ പരിഗണിക്കുമ്പോൾ എ.എ.പി എം.എൽ.എ മാന്യമായി വസ്ത്രം ധരിച്ചില്ലെന്ന വിമർശനവുമായി ഡൽഹി മുഖ്യമന്ത്രി രേഖ ഗുപ്ത. വടക്കുപടിഞ്ഞാറൻ ഡൽഹിയിലെ കിരാരി മണ്ഡലത്തിൽ നിന്നുള്ള എം.എ.പി ജനപ്രതിനിധി അനിൽ ഝായ്ക്കെതിരെയാണ് മുഖ്യമന്ത്രി പരസ്യവിമർശനവുമായി രംഗത്തെത്തിയത്.
ബനിയനും ഷോർട്സും ധരിച്ച് കസേരയിൽ ചമ്രം പടിഞ്ഞിരുന്ന് ജനങ്ങളുടെ അപേക്ഷകളിൽ ഒപ്പുവെക്കുന്ന എം.എ.പി എം.എൽ.എയുടെ ദൃശ്യങ്ങൾ സമൂഹമാധ്യമങ്ങളിൽ വൻതോതിൽ പ്രചരിച്ചതിന് പിന്നാലെയാണ് സംഭവം. സ്ത്രീകൾക്കുള്ള സാമ്പത്തിക സഹായ പദ്ധതിയുടെ അപേക്ഷാ ഫോമുകൾ പരിഗണിക്കുമ്പോഴാണ് എം.എ.പി എം.എൽ.എ അനാദരവോടെ പെരുമാറിയതെന്ന് രേഖ ഗുപ്ത കുറ്റപ്പെടുത്തി.
സ്ത്രീകളുടെ മുന്നിൽ വെച്ച് അപമര്യാദയായി പെരുമാറിയ അനിൽ ഝായുടെ നിയമസഭാംഗത്വം റദ്ദാക്കണമെന്നും മുഖ്യമന്ത്രി ആവശ്യപ്പെട്ടു. കൂടാതെ, സഭയിൽ വെച്ച് എം.എ.പി എം.എൽ.എ അശ്ലീല ആംഗ്യം കാണിച്ചതായും മുഖ്യമന്ത്രി ആരോപിച്ചു.
എന്നാൽ, മുഖ്യമന്ത്രിയുടെ ആരോപണങ്ങൾ പൂർണ്ണമായും തള്ളിക്കളഞ്ഞ അനിൽ ഝാ, താൻ മോശമായി പെരുമാറിയെന്ന് തെളിയിക്കുന്ന ദൃശ്യങ്ങൾ ഉണ്ടെങ്കിൽ പുറത്തുവിടാൻ വെല്ലുവിളിച്ചു. ജനങ്ങളുടെ അടിസ്ഥാന പ്രശ്നങ്ങൾക്ക് പരിഹാരം കാണാൻ സാധിക്കാത്തതുകൊണ്ടാണ് ഭരണപക്ഷം ഇത്തരം വ്യാജ ആരോപണങ്ങൾ ഉന്നയിക്കുന്നതെന്നും അദ്ദേഹം കൂട്ടിച്ചേർത്തു.
അർഹരായ സ്ത്രീകൾക്ക് പ്രതിമാസം 2,500 രൂപ വീതം സാമ്പത്തിക സഹായം നൽകുന്ന ‘ഡൽഹി ലക്ഷ്മി യോജന’ പദ്ധതി ആഗസ്റ്റ് 1-നാണ് ആരംഭിച്ചത്. പദ്ധതി തുടങ്ങി ആദ്യ ആഴ്ചയ്ക്കുള്ളിൽ തന്നെ 5.14 ലക്ഷത്തിലധികം പേരാണ് രജിസ്റ്റർ ചെയ്തത്. പദ്ധതിക്ക് ലഭിച്ച വൻ സ്വീകാര്യതയെ ഭരണപക്ഷം പ്രശംസിച്ചപ്പോൾ, നിലവിലെ മാനദണ്ഡങ്ങൾ പാവപ്പെട്ട നിരവധി സ്ത്രീകളെ പദ്ധതിയിൽ നിന്ന് പുറന്തള്ളുന്നതാണെന്ന് എ.എ.പി വിമർശിച്ചു.
