കൊച്ചി: ദുൽഖർ സൽമാൻ നായകനാവുന്ന ബിഗ് ബജറ്റ് ചിത്രം ‘ഐ ആം ഗെയിം’ സെപ്റ്റംബർ മൂന്നിന് തിയേറ്ററുകളിലെത്തും. നേരത്തെ ഓണം റിലീസായി ഓഗസ്റ്റ് 20-ന് എത്തുമെന്ന് പ്രഖ്യാപിച്ചിരുന്ന ചിത്രത്തിന്റെ റിലീസ്, കൂടുതൽ ആഗോള മാർക്കറ്റുകളിലേക്ക് ചിത്രം എത്തിക്കുന്നതിന്റെ ഭാഗമായാണ് രണ്ടു ആഴ്ചകൂടി നീട്ടിയത്. പാൻ-ഇന്ത്യൻ തലത്തിൽ വമ്പൻ റിലീസിനാണ് അണിയറപ്രവർത്തകർ പദ്ധതിയിടുന്നത്.
നഹാസ് ഹിദായത് സംവിധാനം ചെയ്യുന്ന ഈ ഫാന്റസി ത്രില്ലർ ചിത്രം ദുൽഖറിന്റെ കരിയറിലെ തന്നെ ഏറ്റവും ഉയർന്ന ബജറ്റിൽ ഒരുങ്ങുന്ന സിനിമകളിലൊന്നാണ്. വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്ന് നിർമിക്കുന്ന ചിത്രത്തിന് തിരക്കഥയൊരുക്കിയിരിക്കുന്നത് സജീർ ബാബ, ഇസ്മായിൽ അബൂബക്കർ, ബിലാൽ മൊയ്ദു എന്നിവരാണ്. സജീർ ബാബ, ആദർശ് സുകുമാരൻ, ഷബാസ് റഷീദ് എന്നിവർ ചേർന്നാണ് സംഭാഷണം തയ്യാറാക്കിയത്.
സിനിമ കൂടുതൽ പ്രേക്ഷകരിലേക്ക് എത്തിക്കുക എന്ന ലക്ഷ്യത്തോടെയാണ് പുതിയ റിലീസ് തീയതി തീരുമാനിച്ചതെന്ന് ദുൽഖർ സൽമാൻ സോഷ്യൽ മീഡിയയിലൂടെ അറിയിച്ചു. മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും ചിത്രം പ്രദർശനത്തിനെത്തും. മെഗാ കാൻവാസിൽ നിർമിച്ച ചിത്രം അതിന്റെ പൂർണതയിൽ തിയേറ്ററുകളിൽ എത്തിക്കാനാണ് ഈ മാറ്റമെന്നും അണിയറപ്രവർത്തകർ വ്യക്തമാക്കി.
ചിത്രത്തിന്റെതായി പുറത്തിറങ്ങിയ ട്രെയ്ലറിനും ആദ്യ ഗാനത്തിനും മികച്ച പ്രതികരണമാണ് സിനിമാപ്രേമികളിൽ നിന്ന് ലഭിച്ചത്. മികച്ച ദൃശ്യാവിഷ്കാരവും ആക്ഷൻ രംഗങ്ങളും വാഗ്ദാനം ചെയ്യുന്ന ചിത്രം തിയേറ്ററുകളിൽ വേറിട്ട അനുഭവമായിരിക്കുമെന്നാണ് സൂചന. മാസ് സ്റ്റൈലിഷ് ലുക്കിലാണ് ദുൽഖർ ചിത്രത്തിലെത്തുന്നത്.
