തിരുവനന്തപുരം: വെള്ളം കുടിക്കാതിരിക്കുന്നതും തെറ്റായ ഭക്ഷണശീലങ്ങളും വ്യായാമമില്ലാത്ത ജീവിതശൈലിയും അമിതവണ്ണവും മൂലം ചെറുപ്പക്കാരിൽ പോലും കിഡ്നി സ്റ്റോൺ (വൃക്കയിലെ കല്ല്) രൂപപ്പെടുന്ന പ്രവണത ആശങ്കാജനകമായി വർദ്ധിച്ചുവരുന്നു. തുടർച്ചയായ നടുവേദനയാണ് ഇതിന്റെ പ്രധാന ലക്ഷണമെങ്കിലും, പലപ്പോഴും പലരും ഇത് അവഗണിക്കുകയാണ് പതിവ്. തുടക്കത്തിൽ കാര്യമായ ലക്ഷണങ്ങൾ കാണിക്കാറില്ലെങ്കിലും, ശരീരം നൽകുന്ന ചെറിയ സൂചനകൾ പോലും അവഗണിക്കുന്നത് ഭാവിയിൽ ഗുരുതരമായ ആരോഗ്യപ്രശ്നങ്ങൾക്ക് കാരണമാകും.
പ്രധാന ലക്ഷണങ്ങൾ
- തുടർച്ചയായ വേദന: കിഡ്നി സ്റ്റോൺ ഉണ്ടാകുമ്പോൾ പെട്ടെന്ന് ഉണ്ടാകുന്ന കഠിനമായ വേദനയെക്കുറിച്ചാണ് പൊതുവെ ധാരണ. എന്നാൽ, തുടക്കത്തിൽ അടിവയറ്റിലോ മുതുകിന്റെ താഴെ ഭാഗത്തോ വാരിയെല്ലുകൾക്ക് താഴെയോ ചെറു വേദന മാത്രമായിരിക്കാം അനുഭവപ്പെടുക. കല്ല് മൂത്രവാഹിനിയിലേക്ക് നീങ്ങുമ്പോൾ വേദന ശക്തമാകുകയും അടിവയറ്റിലേക്കോ തുടകളുടെ ഇടുക്കിലേക്കോ പടരുകയും ചെയ്യാം.
- മൂത്രത്തിൽ രക്തത്തിന്റെ സാന്നിധ്യം: മൂത്രത്തിന് ചുവപ്പ്, പിങ്ക് അല്ലെങ്കിൽ തവിട്ട് നിറം കാണപ്പെടുന്നത് കിഡ്നി സ്റ്റോണിന്റെ പ്രധാന സൂചനയാണ്. ചിലരിൽ ലബോറട്ടറി പരിശോധനയിലൂടെ മാത്രമേ ഇത് കണ്ടെത്താൻ സാധിക്കൂ.
- യൂറിനറി ഇൻഫെക്ഷന് സമാനമായ ലക്ഷണങ്ങൾ: കല്ല് മൂത്രസഞ്ചിയുടെ സമീപത്താണെങ്കിൽ മൂത്രമൊഴിക്കുമ്പോൾ പുകച്ചിൽ, ഇടയ്ക്കിടെ മൂത്രമൊഴിക്കാനുള്ള തോന്നൽ, മൂത്രമൊഴിക്കാൻ ബുദ്ധിമുട്ട് എന്നിവ ഉണ്ടാകാം. ഇത് പലപ്പോഴും സാധാരണ മൂത്രനാളിയിലെ അണുബാധയാണെന്ന് തെറ്റിദ്ധരിക്കപ്പെടാറുണ്ട്. സ്റ്റോൺ മൂലം മൂത്രതടസ്സം വരികയും അതോടൊപ്പം പനിയും തണുപ്പും ഛർദ്ദിയും അനുഭവപ്പെടുകയും ചെയ്താൽ ഒരിക്കലും നിസ്സാരമായി കാണരുത്.
നേരത്തെയുള്ള രോഗനിർണ്ണയം പ്രധാനം
ചെറിയ സ്റ്റോണുകൾ ആഴ്ചകളോളമോ മാസങ്ങളോളമോ യാതൊരു ലക്ഷണവും കാണിക്കാതെ ശരീരത്തിൽ തുടരാം. എങ്കിലും കുടുംബത്തിൽ കിഡ്നി സ്റ്റോൺ ചരിത്രമുള്ളവർ, ശരീരത്തിൽ ഇടയ്ക്കിടെ നിർജ്ജലീകരണം ഉണ്ടാകുന്നവർ, പ്രമേഹവും അമിതവണ്ണവുമുള്ളവർ, കൂടുതൽ ഉപ്പും പ്രൊസസ്സ് ചെയ്ത ഭക്ഷണങ്ങളും കഴിക്കുന്നവർ എന്നിവർ തുടർച്ചയായി അനുഭവപ്പെടുന്ന നടുവേദനയോ മൂത്രതടസ്സമോ ഗൗരവത്തോടെ കാണേണ്ടതുണ്ട്.
പ്രതിരോധ മാർഗ്ഗങ്ങൾ
- ധാരാളം വെള്ളം കുടിക്കുക: കിഡ്നി സ്റ്റോൺ രൂപപ്പെടാതിരിക്കാൻ ഏറ്റവും പ്രധാനം ശരീരത്തിൽ ആവശ്യത്തിന് ജലാംശം നിലനിർത്തുക എന്നതാണ്.
- ഉപ്പിന്റെ ഉപയോഗം കുറയ്ക്കുക: ഭക്ഷണത്തിൽ അമിതമായി ഉപ്പ് ഉപയോഗിക്കുന്നത് വൃക്കയിൽ കല്ല് ഉണ്ടാകാനുള്ള സാധ്യത ഗണ്യമായി വർദ്ധിപ്പിക്കും.
- ആരോഗ്യകരമായ ഭക്ഷണക്രമം: പോഷകസമൃദ്ധമായ ഭക്ഷണം ശീലമാക്കുക. ഒപ്പം അമിതവണ്ണവും മെറ്റബോളിക് പ്രശ്നങ്ങളും കൃത്യമായ വ്യായാമത്തിലൂടെ നിയന്ത്രിക്കുക.
