എക്‌സ്, ഗ്രോക്ക്, കർസർ ഇനി ഒറ്റ കുടക്കീഴിൽ; പുതിയ സബ്‌സ്‌ക്രിപ്ഷൻ പ്ലാനുകളുമായി ഇലോൺ മസ്‌ക്; നിരക്കുകൾ അറിയാം

സോഷ്യൽ മീഡിയ പ്ലാറ്റ്‌ഫോമായ എക്‌സ് (X), എ.ഐ ചാറ്റ്‌ബോട്ടായ ഗ്രോക്ക് (Grok), ജനപ്രിയ കോഡിങ് ടൂളായ കർസർ (Cursor) എന്നിവയെ ഒരൊറ്റ സബ്‌സ്‌ക്രിപ്ഷൻ പദ്ധതിക്ക് കീഴിലാക്കി ഇലോൺ മസ്‌കിന്റെ പ്രഖ്യാപനം. ഉപയോക്താക്കൾക്കും ബിസിനസ് സ്ഥാപനങ്ങൾക്കും ഒരൊറ്റ പ്ലാനിലൂടെ ഇനി ഈ മൂന്ന് സേവനങ്ങളും ലഭ്യമാകും. 8 ഡോളർ മുതൽ 200 ഡോളർ വരെ നിരക്കുകളിലാണ് പുതിയ പദ്ധതികൾ അവതരിപ്പിച്ചിരിക്കുന്നത്.

വിവിധ സേവനങ്ങൾക്കായി പ്രത്യേകം പണം നൽകുന്ന രീതി ഒഴിവാക്കി, ഏകീകൃത അംഗത്വത്തിലൂടെ സോഷ്യൽ മീഡിയ, എ.ഐ സംവിധാനങ്ങൾ, സോഫ്റ്റ്‌വെയർ വികസന ടൂളുകൾ എന്നിവ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.

പ്രധാന സബ്‌സ്‌ക്രിപ്ഷൻ പ്ലാനുകളും നിരക്കുകളും:

• പ്ലസ് പ്ലാൻ ($8/പ്രതിമാസം - ഏകദേശം ₹767): പ്രാരംഭ പ്ലാനാണിത്. ഗ്രോക്കിന്റെ ചാറ്റ്, വോയ്‌സ് ചാറ്റ്, ഇമേജ് ജനറേഷൻ, ആപ്പ് നിർമാണം, കർസർ കോഡിങ് ടൂൾ, എ.പി.ഐ ആക്‌സസ് എന്നിവ ഇതിൽ ഉൾപ്പെടുന്നു. കൂടാതെ എക്‌സിലെ പ്രീമിയം വെരിഫിക്കേഷൻ ബാഡ്ജ്, പരസ്യങ്ങളുടെ കുറവ്, ക്രിയേറ്റർ ടൂളുകൾ എന്നിവയും ലഭ്യമാകും.

• പ്രീമിയം പ്ലാൻ ($30/പ്രതിമാസം - ഏകദേശം ₹2,855): അഡ്വാൻസ്ഡ് ഗ്രോക്ക് എ.ഐ മോഡലുകൾ, വേഗത്തിലുള്ള മറുപടികൾ, എ.ഐ ഉപയോഗിച്ചുള്ള ചിത്ര-വീഡിയോ നിർമാണം എന്നിവ ഇതിലുണ്ട്. കർസർ ഉപയോക്താക്കൾക്ക് കോഡ് ഹോസ്റ്റിങ്, ക്ലൗഡ് ഏജന്റുകൾ, ഓട്ടോമേഷൻ സൗകര്യങ്ങൾ എന്നിവയും ലഭിക്കും.

• സൂപ്പർ പ്ലാൻ ($100/പ്രതിമാസം - ഏകദേശം ₹9,516): തിരക്കേറിയ സമയങ്ങളിലും ഗ്രോക്ക് എ.ഐ മോഡലുകളിലേക്ക് മുൻഗണനാക്രമത്തിൽ ആക്‌സസ് ഉറപ്പാക്കുന്ന പ്ലാനാണിത്.

• അൾട്രാ പ്ലാൻ ($200/പ്രതിമാസം - ഏകദേശം ₹19,031): കമ്പനിയുടെ ഏറ്റവും ഉയർന്ന പ്ലാനാണിത്. പുതിയ ഉൽപ്പന്നങ്ങളും എ.ഐ മോഡലുകളും ഔദ്യോഗികമായി പുറത്തിറങ്ങുന്നതിന് മുൻപ് തന്നെ പരീക്ഷിക്കാനുള്ള അവസരം ഈ പ്ലാൻ തിരഞ്ഞെടുക്കുന്നവർക്ക് ലഭിക്കും.

ലളിതമാക്കി പുതിയ സംവിധാനം

നേരത്തെ എക്‌സിനും ഗ്രോക്കിനും വ്യത്യസ്ത സബ്‌സ്‌ക്രിപ്ഷനുകളായിരുന്നു ഉണ്ടായിരുന്നത്. എക്‌സിൽ ബേസിക്, പ്രീമിയം, പ്രീമിയം പ്ലസ് എന്നീ പ്ലാനുകളും, ഗ്രോക്കിൽ സൂപ്പർഗ്രോക്ക്, സൂപ്പർഗ്രോക്ക് പ്ലസ്, സൂപ്പർഗ്രോക്ക് ഹെവി ഉൾപ്പെടെ ഏഴോളം സങ്കീർണ്ണമായ ഓപ്ഷനുകളുമുണ്ടായിരുന്നു. ഈ ആശയക്കുഴപ്പം ഒഴിവാക്കാനാണ് പുതിയ മാറ്റം.

വ്യക്തികൾക്ക് പുറമെ പ്രൊഫഷണലുകളെയും കോർപ്പറേറ്റ് സ്ഥാപനങ്ങളെയും ലക്ഷ്യമിട്ടാണ് പുതിയ പ്ലാനുകൾ രൂപകൽപ്പന ചെയ്തിരിക്കുന്നത്. ബിസിനസ് ഗ്രൂപ്പുകൾക്കായി പ്രത്യേകം ടീം പ്ലാനുകളും ആവശ്യാനുസൃത മാറ്റങ്ങൾ വരുത്താവുന്ന കസ്റ്റം പ്ലാനുകളും ലഭ്യമാക്കുമെന്ന് കമ്പനി അറിയിച്ചു.