തോക്ക് തകരാറിലായത് രക്ഷ! ചിക്കാഗോയിലെ ഹിന്ദു ക്ഷേത്രത്തിൽ കൂട്ടക്കുരുതി നടത്താൻ പദ്ധതിയിട്ട 19-കാരൻ പിടിയിൽ

ചിക്കാഗോ: അമേരിക്കയിലെ ചിക്കാഗോയ്ക്ക് സമീപമുള്ള ഹിന്ദു ആരാധനാലയത്തിന് നേരെ കൂട്ടക്കുരുതിക്ക് പദ്ധതിയിട്ട 19-കാരൻ അറസ്റ്റിൽ. ഇല്ലിനോയിയിലെ പാലറ്റൈൻ സ്വദേശി അലക്സാണ്ട്രോസ് പപോരാക്കിസാണ് പൊലീസിന്റെ പിടിയിലായത്. തോക്കുമായി പ്രതി ക്ഷേത്രത്തിലെത്തിയെങ്കിലും ആയുധത്തിന് സംഭവിച്ച സാങ്കേതിക തകരാറ് കാരണം വലിയൊരു ദുരന്തം ഒഴിവാകുകയായിരുന്നു എന്ന് പൊലീസ് വ്യക്തമാക്കി. ഇയാൾ അയച്ച സംശയാസ്പദമായ സന്ദേശങ്ങളെക്കുറിച്ച് മൗണ്ട് പ്രോസ്പെക്ട് പൊലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ് കഴിഞ്ഞ ഞായറാഴ്ച വൈകുന്നേരം ഇയാളെ കസ്റ്റഡിയിലെടുത്തത്. ഒക്ടോബർ 11-ന് ഒറോറ പ്രദേശത്തെ ഹിന്ദു ക്ഷേത്രം കേന്ദ്രീകരിച്ച് കൂട്ടവെടിവെപ്പ് നടത്താനായിരുന്നു ഇയാൾ പദ്ധതിയിട്ടിരുന്നതെന്നാണ് എഫ്.ബി.ഐയുടെയും പ്രാദേശിക പൊലീസിന്റെയും സംശയം. ആക്രമണ ഭീഷണിയുടെ പശ്ചാത്തലത്തിൽ ഒറോറ പൊലീസ് പ്രദേശത്തെ മറ്റ് ഹിന്ദു ആരാധനാലയങ്ങൾക്കും ജാഗ്രതാ നിർദ്ദേശം നൽകിയിട്ടുണ്ട്. പ്രതിയുടെ വീട്ടിൽ പൊലീസ് നടത്തിയ റെയ്ഡിൽ തോക്കുകൾ, വെടിയുണ്ടകൾ, ബോഡി ആർമർ, ബുള്ളറ്റ് പ്രൂഫ് ജാക്കറ്റുകൾ എന്നിവയ്ക്ക് പുറമെ വെളുത്ത വർഗക്കാരുടെ വംശീയ അധിനിവേശ ആശയങ്ങൾ പ്രകടിപ്പിക്കുന്ന ലഘുലേഖകളും കണ്ടെത്തി. ഇന്ത്യൻ വംശജർക്കും ദക്ഷിണേഷ്യയിൽ നിന്നുള്ള മറ്റുള്ളവർക്കും എതിരെ സായുധ ആക്രമണം നടത്താൻ ആഹ്വാനം ചെയ്യുന്ന പരാമർശങ്ങളാണ് ഇവയിലുള്ളതെന്ന് എഫ്.ബി.ഐ വ്യക്തമാക്കി. തീവ്രവാദ ഭീഷണി മുഴക്കൽ ഉൾപ്പെടെയുള്ള കടുത്ത കുറ്റങ്ങൾ ചുമത്തി റോളിംഗ് മെഡോസിലെ കുക്ക് കൗണ്ടി തേർഡ് മുനിസിപ്പൽ ഡിസ്ട്രിക്റ്റ് കോടതിയിൽ ഹാജരാക്കിയ പ്രതിയെ നിലവിൽ ജുഡീഷ്യൽ കസ്റ്റഡിയിൽ റിമാൻഡ് ചെയ്തിരിക്കുകയാണ്. കേസിൽ എഫ്.ബി.ഐയുടെ നേതൃത്വത്തിൽ അന്വേഷണം ഊർജിതമാക്കിയിട്ടുണ്ട്. ഒഹായോയിലെ റിച്ച്മണ്ട് ഹൈറ്റ്‌സിലുള്ള ശ്രീ സ്വാമിനാരായണൻ വഡ്താൽ ധാം ഹിന്ദു ക്ഷേത്രം ആക്രമിക്കപ്പെട്ട് ദിവസങ്ങൾക്കകമാണ് സമാനമായ മറ്റൊരു പദ്ധതിയും പൊലീസിന്റെ സമയോചിതമായ ഇടപെടലിൽ തടയപ്പെട്ടിരിക്കുന്നത്.