‘രാഹുൽ ഗാന്ധിയുടെ താണ്ഡവം’; എല്ലാ അഭിപ്രായങ്ങളും ബിജെപിയുടേതല്ല: വി മുരളീധരൻ

തിരുവനന്തപുരം: ബിജെപി സംസ്ഥാന വൈസ് പ്രസിഡന്റും തിരുവനന്തപുരം കോർപ്പറേഷൻ കൗൺസിലറുമായ ആർ. ശ്രീലേഖയുടെ വിവാദ പരാമർശങ്ങളെ തള്ളി വി. മുരളീധരൻ എംഎൽഎ. ബിജെപി വലിയൊരു പ്രസ്ഥാനമാണെന്നും നേതാക്കൾ വ്യക്തിപരമായി പറയുന്ന എല്ലാ അഭിപ്രായങ്ങളും പാർട്ടിയുടെ ഔദ്യോഗിക നിലപാടല്ലെന്നും അദ്ദേഹം വ്യക്തമാക്കി.

ബുധനാഴ്ച പുനലൂരിൽ നടന്ന ബിജെപിയുടെ പ്രതിഷേധ ജനസഭയിലായിരുന്നു ആർ. ശ്രീലേഖയുടെ വിവാദ പരാമർശം. ഡൽഹിയിൽ നടക്കുന്നത് രാഹുൽ ഗാന്ധിയുടെ താണ്ഡവമാണെന്നും അമിതമായി ലഹരിമരുന്ന് ഉപയോഗിച്ചയാളെപ്പോലെയാണ് അദ്ദേഹത്തിന്റെ പെരുമാറ്റമെന്നുമായിരുന്നു ശ്രീലേഖയുടെ ആരോപണം. സ്വന്തം പാർട്ടിയുടെ മന്ത്രിമാരെപ്പോലും തള്ളിമാറ്റിക്കൊണ്ടാണ് രാഹുൽ ഗാന്ധി പ്രവർത്തിക്കുന്നതെന്നും അവർ പരിഹസിച്ചിരുന്നു. ഡൽഹിയിലെ പ്രതിഷേധത്തിനിടെ കർണാടക ഉപമുഖ്യമന്ത്രി ഡി.കെ. ശിവകുമാറിനെയും ഗർഭിണിയായ വനിതാ മാധ്യമപ്രവർത്തകയെയും രാഹുൽ ഗാന്ധി തള്ളിമാറ്റിയെന്ന വാർത്തകളെ ആസ്പദമാക്കിയായിരുന്നു ശ്രീലേഖയുടെ പ്രതികരണം.

മാസപ്പടി കേസിൽ സർക്കാരിനെതിരെ വിമർശനം

മാസപ്പടി കേസിൽ എൻഫോഴ്സ്‌മെന്റ് ഡയറക്ടറേറ്റ് (ഇ.ഡി) കൃത്യമായ തെളിവുകളും രേഖകളും കൈമാറിയിട്ടും അന്വേഷണത്തിന് മടിക്കുന്ന സംസ്ഥാന സർക്കാരിനെയും വി. മുരളീധരൻ രൂക്ഷമായി വിമർശിച്ചു. പിണറായി വിജയൻ തുടരുന്നത് പ്രതിപക്ഷത്തിന് തന്നെ അപമാനമാണെന്നും അദ്ദേഹം കൂട്ടിച്ചേർത്തു. അതേസമയം, നിയമസഭയിൽ ബിജെപിക്ക് സംസാരിക്കാൻ അർഹമായ അവസരം നൽകുന്നില്ലെന്ന വിഷയം സ്പീക്കറുടെ ശ്രദ്ധയിൽപ്പെടുത്തിയിട്ടുണ്ടെന്നും വി. മുരളീധരൻ മാധ്യമങ്ങളോട് പറഞ്ഞു.