കൂടുതൽ വൈദ്യുതി വാങ്ങാൻ കെഎസ്ഇബി; ഹ്രസ്വകാല കരാറിന് ടെൻഡർ വിളിച്ചു

തിരുവനന്തപുരം: വരുന്ന വേനൽക്കാലത്ത് സംസ്ഥാനത്ത് തടസ്സമില്ലാത്ത വൈദ്യുതി വിതരണം ഉറപ്പാക്കാൻ കൂടുതൽ വൈദ്യുതി വാങ്ങാൻ കേരള സംസ്ഥാന വൈദ്യുതി ബോർഡ് (കെഎസ്ഇബി) നടപടികൾ ആരംഭിച്ചു. ഇതിനായി ഹ്രസ്വകാല കരാറടിസ്ഥാനത്തിൽ വൈദ്യുതി ലഭ്യമാക്കാൻ ടെൻഡർ ക്ഷണിച്ചു. ജനുവരി മുതൽ മേയ് വരെയുള്ള മാസങ്ങളിൽ വൈകീട്ടത്തെ ഉയർന്ന ഉപഭോഗ സമയം (പീക്ക് അവേഴ്സ്) ഉൾപ്പെടെ ലക്ഷ്യമിട്ടാണ് നടപടി.

വേനൽച്ചൂട് കടുക്കുന്നതോടെ ഉണ്ടാകുന്ന വൻ ഉപഭോഗവർധനവ് നേരിടുകയാണ് കെഎസ്ഇബിയുടെ ലക്ഷ്യം. പ്രതിമാസം ആവശ്യമുള്ള വൈദ്യുതിയുടെ അളവു കണക്കാക്കിയാണ് ടെൻഡറുകൾ ക്രമീകരിച്ചിരിക്കുന്നത്. ജനുവരിയിൽ 2,400 മെഗാവാട്ട് വൈദ്യുതി വാങ്ങാനാണ് ടെൻഡർ വിളിച്ചിട്ടുള്ളത്.

തുടർന്നുള്ള മാസങ്ങളിൽ ഉപഭോഗം ഉയരുമെന്ന വിലയിരുത്തലിൽ വാങ്ങുന്ന വൈദ്യുതിയുടെ അളവും വർധിപ്പിക്കും. ഫെബ്രുവരിയിൽ 2,700 മെഗാവാട്ടും മാർച്ചിൽ 3,000 മെഗാവാട്ടും വാങ്ങാൻ ലക്ഷ്യമിടുന്നു. വേനൽച്ചൂട് പരമാവധിയിലെത്തുന്ന ഏപ്രിൽ, മേയ് മാസങ്ങളിൽ 3,900 മെഗാവാട്ട് വീതം വൈദ്യുതി വാങ്ങാനാണ് കെഎസ്ഇബി തയ്യാറെടുക്കുന്നത്.