മിനികൂപ്പർ അപകടത്തിൽ പ്രതിയെ സംരക്ഷിക്കാൻ ഒത്തുകളിയെന്ന ആരോപണം ശക്തമാക്കി കുടുംബം, ഒപ്പം സിപിഎമ്മും; ഇല്ലെന്ന് പൊലീസ്, സംരക്ഷിക്കില്ലെന്ന് ചെന്നിത്തല
Nazeema
സ്റ്റാഫ് റിപ്പോർട്ടർ
നെടുമ്പാശേരി മിനികൂപ്പര്‍ അപകടത്തില്‍ പ്രതിയെ സംരക്ഷിക്കാന്‍ ഒത്തുകളിയുണ്ടെന്ന് കുടുംബവും സിപിഎമ്മും ആരോപിച്ചെങ്കിലും, പൊലീസും ആഭ്യന്തരമന്ത്രിയും ഇത് തള്ളി. പഴുതടച്ച അന്വേഷണമാണ് നടക്കുന്നതെന്നും പ്രതിക്കെതിരെ കര്‍ശന നടപടിയുണ്ടാകുമെന്നും അധികൃതര്‍ വ്യക്തമാക്കി.
നെടുമ്പാശേരി മിനികൂപ്പര്‍ അപകടത്തില്‍ പ്രതിയെ സംരക്ഷിക്കാന്‍ ഒത്തുകളിയെന്ന ആരോപണവുമായി മരിച്ചവരുടെ കുടുംബവും സിപിഎമ്മും രംഗത്തെത്തിയെങ്കിലും, ആക്ഷേപങ്ങള്‍ പൂര്‍ണ്ണമായി തള്ളിക്കളഞ്ഞ് പൊലീസും ആഭ്യന്തരമന്ത്രിയും. പഴുതടച്ച അന്വേഷണമാണ് നടക്കുന്നതെന്നും എഫ്‌ഐആര്‍ പ്രാഥമിക രേഖ മാത്രമാണെന്നും വ്യക്തമാക്കിയ പൊലീസ്, തുടരന്വേഷണത്തിലാണ് സുഹൈല്‍ സജീവിന്‍റെ പേര് പ്രതിപ്പട്ടികയില്‍ ചേര്‍ത്തതെന്നും ശക്തമായ നടപടികളുണ്ടാകുമെന്നും അറിയിച്ചു. മൂന്ന് പേരുടെ ദാരുണ മരണത്തിനിടയാക്കിയ സംഭവത്തില്‍ പണവും സ്വാധീനവുമുള്ള പ്രതിയെ രക്ഷിക്കാന്‍ ശ്രമം നടക്കുന്നുവെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍ അടക്കമുള്ളവര്‍ ആരോപിക്കുകയും ഡിവൈഎഫ്‌ഐ സ്റ്റേഷനിലേക്ക് മാര്‍ച്ച് നടത്തുകയും ചെയ്തിരുന്നു. എന്നാല്‍ മദ്യപിച്ചതായി വൈദ്യപരിശോധനയില്‍ തെളിഞ്ഞ ശേഷമാണ് നടപടിയുണ്ടായതെന്നും നിയമപ്രകാരമാണ് കോടതി പ്രതിയെ ബോസ്റ്റല്‍ സ്‌കൂളിലേക്ക് റിമാന്‍ഡ് ചെയ്തതെന്നും പൊലീസ് വിശദീകരിച്ചു. പ്രതിയെ കസ്റ്റഡിയില്‍ വാങ്ങുന്നതിനുള്ള അപേക്ഷയും ജാമ്യാപേക്ഷയും നാളെയും മറ്റന്നാളുമായി അങ്കമാലി മജിസ്ട്രേറ്റ് കോടതി പരിഗണിക്കും. പ്രായപൂര്‍ത്തിയാകാതെ ബാറില്‍ കയറി മദ്യപിച്ചതിന് സുഹൈലിനെതിരെ എക്‌സൈസ് കേസെടുത്തിട്ടുണ്ട് കൂടാതെ പൊലീസ് റിപ്പോര്‍ട്ട് ലഭിക്കുന്ന മുറയ്ക്ക് മോട്ടോര്‍ വാഹന വകുപ്പ് ലൈസന്‍സ് റദ്ദാക്കാനുള്ള നടപടികളും സ്വീകരിക്കും.
