'എല്ലാ തീരുമാനങ്ങളും മുതിർന്ന നേതാക്കളു‌ടെ അനുമതിയോടെ'; അടൂർ പ്രകാശിന്റെ പരാതി തള്ളി മുഖ്യമന്ത്രി വി ഡി സതീശൻ

തിരുവനന്തപുരം: യു.ഡി.എഫ് കൺവീനർ അടൂർ പ്രകാശ് നൽകിയ പരാതി തള്ളി പ്രതിപക്ഷ നേതാവ് വി.ഡി. സതീശൻ. പ്രതിപക്ഷത്തിന്റെയും പാർട്ടിയുടെയും എല്ലാ തീരുമാനങ്ങളും മുന്നണി നയങ്ങൾക്കും രീതികൾക്കും അനുസരിച്ചാണ് മുന്നോട്ടുപോകുന്നതെന്ന് സതീശൻ വ്യക്തമാക്കി. ഓരോ തീരുമാനങ്ങളും മുതിർന്ന നേതാക്കളുടെ കൃത്യമായ അനുമതിയോടെയാണെന്നും വാർത്താ ഏജൻസിയോട് സംസാരിക്കവെ അദ്ദേഹം പറഞ്ഞു. വിഷയത്തിൽ ആദ്യമായാണ് പ്രതിപക്ഷ നേതാവിന്റെ ഭാഗത്തുനിന്ന് പ്രതികരണമുണ്ടാകുന്നത്.

പ്രതിപക്ഷ നേതാവിന്റെ പ്രവർത്തന ശൈലിയെ രൂക്ഷമായി വിമർശിച്ചുകൊണ്ട് അടൂർ പ്രകാശ് എ.ഐ.സി.സി അധ്യക്ഷൻ മല്ലികാർജുൻ ഖാർഗെയ്ക്ക് പരാതി നൽകിയ പശ്ചാത്തലത്തിലാണ് വി.ഡി. സതീശന്റെ പ്രതികരണം.

പരാതിയിലെ പ്രധാന ആരോപണങ്ങൾ:

• ഏകപക്ഷീയ തീരുമാനങ്ങൾ: പാർട്ടിയെയും മുന്നണിയെയും അവഗണിച്ച് പ്രതിപക്ഷ നേതാവ് ഏകപക്ഷീയമായി തീരുമാനങ്ങളെടുക്കുന്നു.

• കൺവീനർക്ക് അവഗണന: യു.ഡി.എഫ് കൺവീനർ എന്ന നിലയിൽ തന്നെ പൂർണമായി അവഗണിക്കുന്നു.

• വിവരങ്ങൾ മാധ്യമങ്ങളിലൂടെ: പ്രധാനം എന്ന് കരുതുന്ന പല തീരുമാനങ്ങളും നേരിട്ട് അറിയിക്കാതെ മാധ്യമങ്ങളിലൂടെയാണ് അറിയുന്നത്.

മഹിളാ കോൺഗ്രസ് നേതൃത്വത്തിന്റെയും മറ്റ് ഘടകകക്ഷികളുടെയും നിലപാടുകൾ അടൂർ പ്രകാശ് എ.ഐ.സി.സിയെ അറിയിച്ചതായാണ് വിവരം. അരമണിക്കൂറോളം നീണ്ട കൂടിക്കാഴ്ചയിൽ ഹൈക്കമാൻഡിന്റെ അടിയന്തര ഇടപെടൽ വേണമെന്ന ശക്തമായ ആവശ്യവും അദ്ദേഹം മുന്നോട്ടുവെച്ചു.

അതേസമയം, സംസ്ഥാന കോൺഗ്രസിലെ നിലവിലെ പ്രതിസന്ധി പരിഹരിക്കാനുള്ള ചർച്ചകളുടെ കാര്യത്തിൽ ഹൈക്കമാൻഡ് തലത്തിൽ അനിശ്ചിതത്വം തുടരുകയാണ്. അടൂർ പ്രകാശിന്റെ പരാതിയിൽ ഉടനടി തുടർന്നടപടികൾ ഉണ്ടായേക്കില്ലെന്നാണ് സൂചന. രാഹുൽ ഗാന്ധി ഉൾപ്പെടെയുള്ള മുതിർന്ന നേതാക്കൾ മറ്റു വിഷയങ്ങളിലെ പ്രക്ഷോഭ തിരക്കുകളിലായതിനാൽ പ്രശ്നപരിഹാരത്തിന് സമയമെടുത്തേക്കും. ആവശ്യമെങ്കിൽ സംസ്ഥാന നേതൃത്വത്തെ വീണ്ടും ഡൽഹിയിലേക്ക് വിളിപ്പിച്ചേക്കും.