15 വയസ്സുകാരനെ വീട്ടിൽ കയറി തട്ടിക്കൊണ്ടുപോയി ഉപദ്രവിച്ചു; രണ്ട് പേർ പിടിയിൽ

കൊച്ചി: ആലുവ കുന്നത്തേരിയിൽ വാടകയ്ക്ക് താമസിക്കുന്ന പതിനഞ്ചുകാരനെ വീട്ടിൽ കയറി തട്ടിക്കൊണ്ടുപോയി ഉപദ്രവിച്ച കേസിൽ രണ്ടു പേർ അറസ്റ്റിൽ. കാക്കനാട് വികാസവാണി ഭാഗത്ത് വെളുത്തേടത്ത് പറമ്പിൽ മുൻസിർ (21), ആലുവ മുച്ചംകുളം ചിറമേൽ പറമ്പിൽ വീട്ടിൽ ഷാജഹാൻ (23) എന്നിവരെയാണ് ആലുവ സി.ഐ. പി.എം. ഷെമീറിന്റെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്. പ്രതികളിൽ ഒരാളും കുട്ടിയുടെ സുഹൃത്തും തമ്മിലുണ്ടായിരുന്ന മുൻവൈരാഗ്യമാണ് ആക്രമണത്തിന് കാരണം.

ശനിയാഴ്ച ഉച്ചയോടെയാണ് സുഹൃത്തിനെ തിരക്കി പ്രതികൾ കുട്ടിയുടെ വീട്ടിലെത്തിയത്. തുടർന്ന് കുട്ടിയെ ബൈക്കിൽ ബലമായി കയറ്റി സംഘം തട്ടിക്കൊണ്ടുപോവുകയായിരുന്നു. പെരിങ്ങാലയിലെ ഒരു വീട്ടിലെത്തിച്ച കുട്ടിയെ ക്രൂരമായി മർദ്ദിക്കുകയും ബ്ലേഡ് കൊണ്ട് ശരീരത്തിൽ മുറിവേൽപ്പിക്കുകയും ചെയ്തു.

സംഭവം അറിഞ്ഞയുടൻ കുട്ടിയുടെ അമ്മ ആലുവ പൊലീസിൽ പരാതി നൽകി. പരാതി ലഭിച്ച ഉടൻ തന്നെ പോലീസ് കേസെടുത്ത് അന്വേഷണം ആരംഭിച്ചു. അമ്മ പൊലീസിനെ സമീപിച്ച വിവരം മനസ്സിലാക്കിയ പ്രതികൾ, കുട്ടിയെ കങ്ങരപ്പടിയിലെ ബസ് സ്റ്റോപ്പിന് സമീപം ഇറക്കിവിട്ട് രക്ഷപ്പെടാൻ ശ്രമിച്ചു.

തുടർന്ന് നടത്തിയ ശാസ്ത്രീയ അന്വേഷണത്തിൽ പ്രതികളെ തിരിച്ചറിഞ്ഞ പോലീസ്, ഇവർ നിരവധി ക്രിമിനൽ കേസുകളിൽ പ്രതികളാണെന്ന് കണ്ടെത്തി. വിവിധ സംഘങ്ങളായി തിരിഞ്ഞ് നടത്തിയ തിരച്ചിലിനൊടുവിൽ ശനിയാഴ്ച രാത്രി പള്ളിക്കരയിലെ പെട്രോൾ പമ്പിൽ വാഹനത്തിന് ഇന്ധനം നിറയ്ക്കാനെത്തിയ പ്രതികളെ പോലീസ് വളഞ്ഞു. പിടിയിലാകുമെന്ന് ഉറപ്പായതോടെ പ്രതികൾ പോലീസിനെതിരെ കത്തി വീശി ആക്രമിക്കുകയായിരുന്നു. ഈ ആക്രമണത്തിൽ ചില പൊലീസുകാർക്ക് പരിക്കേൽക്കുകയും ചെയ്തു.

വലിയ ചെറുത്തുനിൽപ്പുകൾക്കൊടുവിലാണ് പോലീസ് പ്രതികളെ സാഹസികമായി കീഴ്പെടുത്തി അറസ്റ്റ് ചെയ്തത്. ഒന്നാം പ്രതിക്കെതിരെ 10 കേസുകളും രണ്ടാം പ്രതിക്കെതിരെ 6 കേസുകളും നിലവിലുണ്ട്. പരിക്കേറ്റ കുട്ടി ആശുപത്രിയിൽ ചികിത്സയിലാണ്. പ്രതികൾക്കെതിരെ ജീവപര്യന്തം വരെ തടവുശിക്ഷ ലഭിക്കാവുന്ന ഗുരുതരമായ വകുപ്പുകളാണ് ചുമത്തിയിരിക്കുന്നത്.

ആലുവ ഡി.വൈ.എസ്.പി. ബൈജു പൗലോസിന്റെ മേൽനോട്ടത്തിൽ രൂപീകരിച്ച പ്രത്യേക അന്വേഷണ സംഘത്തിൽ ആലുവ സർക്കിൾ ഇൻസ്പെക്ടർ പി.എം. ഷെമീർ, എസ്.ഐ.മാരായ ബെന്നി കുര്യാക്കോസ്, സുരേഷ് കുമാർ, സി.പി.ഒ.മാരായ മാഹിൻ ഷാ അബൂബക്കർ, മുഹമ്മദ് ഷാഹിൻ, കെ.എം. മനോജ് എന്നിവരാണ് ഉണ്ടായിരുന്നത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. കേസിൽ ഉൾപ്പെട്ട മൂന്നാമത്തെ പ്രതിക്കായി പോലീസ് അന്വേഷണം ഊർജിതമാക്കിയിട്ടുണ്ട്.