ഷട്ടറിന്‍റെ പൂട്ട് തകർത്ത് അകത്ത് കയറി സാനിറ്ററി ഷോപ്പിൽ മോഷണം, മാർത്താണ്ഡം സ്വദേശി അറസ്റ്റിൽ

തിരുവനന്തപുരം: പാപ്പനംകോട് പൂഴിക്കുന്നിലെ സാനിറ്ററി ഷോപ്പിൽ ഷട്ടറിന്‍റെ പൂട്ട് തകർത്ത് മോഷണം നടത്തിയ കേസിൽ മാർത്താണ്ഡം സ്വദേശി അറസ്റ്റിൽ. മാർത്താണ്ഡം സ്വദേശി ജസീമിനെയാണ് (29) നേമം പൊലീസ് അറസ്റ്റ് ചെയ്തത്.

പൂഴിക്കുന്ന് ജങ്ഷനു സമീപമുള്ള സ്ഥാപനത്തിൽ ശനിയാഴ്ച പുലർച്ചെയായിരുന്നു സംഭവം. കടയുടെ ഷട്ടറിന്‍റെ പൂട്ട് പൊളിച്ച് അകത്തുകയറിയ പ്രതി, സ്ഥാപനത്തിൽനിന്ന് 52,000 രൂപയും ഒരു മൊബൈൽ ഫോണും കവർന്നതായാണ് ഉടമയുടെ പരാതി. മുഖം തുണികൊണ്ട് മറച്ച ഒരാൾ കടയിലെ മേശപ്പുറത്തുണ്ടായിരുന്ന വസ്തുക്കൾ പരിശോധിക്കുന്ന സിസിടിവി ദൃശ്യങ്ങൾ പൊലീസ് ശേഖരിച്ചിട്ടുണ്ട്. സംഭവമറിഞ്ഞ് നേമം പൊലീസ് സ്ഥലത്തെത്തി വിശദമായ പരിശോധന നടത്തി.തുടർന്ന് നടത്തിയ അന്വേഷണത്തിനൊടുവിലാണ് പ്രതിയെ പിടികൂടിയത്.

കഴിഞ്ഞ ഒരാഴ്ചയ്ക്കിടെ നേമം പോലീസ് സ്റ്റേഷൻ പരിധിയിലെ വിവിധ കടകളിൽ സമാനമായ മോഷണശ്രമങ്ങളും സംഭവങ്ങളും റിപ്പോർട്ട് ചെയ്തിട്ടുണ്ട്. രണ്ട് ദിവസം മുമ്പ് പാപ്പനംകോട് തുക്കുവിളയ്ക്ക് സമീപത്തെ ടെക്സ്റ്റൈൽസ് സ്ഥാപനത്തിലും ബ്യൂട്ടി പാർലറിലും സമാനമായ രീതിയിൽ മോഷണം നടന്നിരുന്നു. ടെക്സ്റ്റൈൽസിൽനിന്ന് തുണികളും പണവും നഷ്ടപ്പെട്ടതായാണ് വിവരം. നിലവിലുള്ള മോഷണക്കേസുകൾ തമ്മിൽ പരസ്പരം ബന്ധമുണ്ടോയെന്ന കാര്യത്തിൽ പൊലീസ് അന്വേഷണം വ്യാപിപ്പിച്ചിട്ടുണ്ട്.