‘വോട്ട് ചോരി’ ആരോപണങ്ങളെ രാഷ്ട്രപതി അനുകൂലിച്ചെന്ന വാദം തെറ്റ്; രാഹുൽ ഗാന്ധി പറഞ്ഞത് നുണയെന്ന് കേന്ദ്രം

ഡൽഹി: വോട്ട് ചോരി ആരോപണം രാഷ്ട്രപതി അനുകൂലിച്ചെന്ന ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ പരാമർശം നുണയെന്ന് കേന്ദ്ര സർക്കാർ വൃത്തങ്ങൾ. വാർത്ത ഏജൻസി PTI ആണ് കേന്ദ്ര സർക്കാർ വൃത്തങ്ങളെ ഉദ്ധരിച്ച് വിവരം പുറത്ത് വിട്ടത്. വോട്ട് ചോരി ആരോപണം രാഷ്ട്രപതി തള്ളി കളഞ്ഞില്ലെന്നായിരുന്നു കൂടിക്കാഴ്ചയ്ക്ക് ശേഷം രാഹുൽ ഗാന്ധിയുടെ പ്രതികരണം.

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ അടിയന്തരമായി പുറത്താക്കണമെന്ന് ആവശ്യപ്പെട്ട് ഇന്നലെ ഇന്ത്യാ സഖ്യ നേതാക്കൾ രാഷ്ട്രപതി ദ്രൗപതി മുർമുവിനെ കണ്ട് നിവേദനം നൽകിയിരുന്നു. പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് അധ്യക്ഷൻ മല്ലികാർജുൻ ഖർഗെ, തൃണമൂൽ കോൺഗ്രസ് അധ്യക്ഷ മമതാ ബാനർജി, സി പി ഐ എം ജനറൽ സെക്രട്ടറി എം എ ബേബി, ഒമർ അബ്ദുള്ള തുടങ്ങിയ പ്രമുഖ പ്രതിപക്ഷ നേതാക്കളെല്ലാം പ്രതിനിധി സംഘത്തിലുണ്ടായിരുന്നു. പ്രധാനമന്ത്രി നരേന്ദ്ര മോദിയും അമിത് ഷായും ഗ്യാനേഷ് കുമാറും ചേർന്ന് ‘വോട്ട് ചോരി’ നടത്താൻ ഗൂഢാലോചന നടത്തിയെന്ന ഗുരുതരമായ ആരോപണമടങ്ങിയ മെമ്മോറാണ്ടമാണ് നേതാക്കൾ രാഷ്ട്രപതിക്ക് കൈമാറിയത്.

കൂടിക്കാഴ്ചയ്ക്ക് ശേഷം മാധ്യമങ്ങളോട് സംസാരിച്ച രാഹുൽ ഗാന്ധി, രാഷ്ട്രപതിയുടെ പ്രതികരണം അവിശ്വസനീയവും അത്ഭുതപ്പെടുത്തുന്നതുമായിരുന്നു എന്ന് വ്യക്തമാക്കിയിരുന്നു. തങ്ങൾ ഉന്നയിച്ച വോട്ട് തട്ടിപ്പ് ആരോപണങ്ങളെയോ വാദങ്ങളെയോ രാഷ്ട്രപതി നിഷേധിച്ചില്ലെന്നും എല്ലാ കാര്യങ്ങളും അനുഭാവപൂർവ്വം കേട്ടിരുന്നതായും അദ്ദേഹം പറഞ്ഞു.

അതേസമയം, ഡൽഹിയിൽ സിജെപിയുടെ നേതൃത്വത്തിൽ സമരം തുടങ്ങുന്നതിനാൽ പ്രതിഷേധ പരിപാടികൾക്ക് രണ്ടു ദിവസത്തെ അവധി നൽകിയിരിക്കുകയാണ് ഇന്ത്യാ സഖ്യം. ഇന്ന് ചെന്നൈയിലെത്തുന്ന രാഹുൽ ഗാന്ധി മുഖ്യമന്ത്രി സി ജോസഫ് വിജയുമായി കൂടിക്കാഴ്ച നടത്തിയേക്കും.