ഡൽഹിയിൽ നിന്നെത്തിച്ച മിക്‌സി കൈപ്പറ്റാനെത്തിയ യുവാക്കളെ പിടികൂടി കൊച്ചി പൊലീസ്; ഇരുവരും അറസ്റ്റിൽ; ഒളിച്ചുകടത്തിയത് 90 ഗ്രാം എംഡിഎംഎ!

കൊച്ചി: ഓപ്പറേഷൻ തൂഫാൻ നാർക്കോ ഹണ്ടിന്റെ ഭാഗമായി കൊച്ചി നഗരത്തിൽ വീണ്ടും വൻ രാസലഹരി വേട്ട. ഡൽഹിയിൽ നിന്ന് കൊറിയർ വഴി മിക്സിക്കുള്ളിൽ ഒളിപ്പിച്ചു കടത്തിയ 90 ഗ്രാമിലധികം എംഡിഎംഎയുമായി രണ്ട് കോട്ടയം സ്വദേശികളെ കൊച്ചി സിറ്റി പോലീസ് സാഹസികമായി പിടികൂടി. കോട്ടയം തൃക്കൊടിത്താനം സ്വദേശികളായ ഷൊൺ ജോസഫ് (21), എബിൻ ബാബു (21) എന്നിവരാണ് അറസ്റ്റിലായത്.

എളമക്കര പോലീസ് സ്റ്റേഷൻ പരിധിയിലെ കാട്ടയിൽ റോഡിന് സമീപമുള്ള ഒരു കൊറിയർ സ്ഥാപനത്തിൽ നിന്നാണ് പ്രതികൾ പിടിയിലായത്. ഡൽഹിയിൽ നിന്ന് പാഴ്സലായി അയച്ച മിക്സി കൈപ്പറ്റാൻ ഇരുവരും നേരിട്ടെത്തുകയായിരുന്നു. ചെക്കിങ്ങിൽ ലഹരിമരുന്ന് കണ്ടെത്താനാകാത്ത വിധം മിക്സിക്കുള്ളിൽ അതീവ രഹസ്യമായി പാക്ക് ചെയ്ത നിലയിലായിരുന്നു എംഡിഎംഎ ഒളിപ്പിച്ചിരുന്നത്.

എന്നാൽ, രഹസ്യവിവരത്തിന്റെ അടിസ്ഥാനത്തിൽ കൊച്ചി സിറ്റി പോലീസ് ഈ നീക്കം നേരത്തെ തന്നെ നിരീക്ഷിക്കുന്നുണ്ടായിരുന്നു. കൊറിയർ സ്ഥാപനത്തിൽ നിന്ന് പാഴ്സൽ വാങ്ങി മടങ്ങുന്നതിനിടയിലാണ് ഡാൻസാഫ് ടീം പ്രതികളെ വളഞ്ഞുപിടിച്ചത്.

വിദ്യാർഥികൾക്കും യുവാക്കൾക്കുമിടയിലെ രാസലഹരി ഉപയോഗത്തിനെതിരെ കൊച്ചി സിറ്റി പോലീസ് ശക്തമായ നടപടികളാണ് സ്വീകരിച്ചു വരുന്നത് എന്ന് കമ്മീഷണർ കാളിരാജ് മഹേഷ് കുമാർ അറിയിച്ചു. കൊച്ചി സിറ്റി ഡിസിപിമാരായ അരുൺ കെ പവിത്രൻ, മോഹിത് റാവത്ത് എന്നിവരുടെ മേൽനോട്ടത്തിൽ നാർക്കോട്ടിക് സെൽ അസിസ്റ്റന്റ് കമ്മീഷണർ എം അനന്തലാലിന്റെ നേതൃത്വത്തിലുള്ള ഡാൻസാഫ് ടീമാണ് അന്വേഷണത്തിനും അറസ്റ്റിനും നേതൃത്വം നൽകിയത്.