മുഖം മറച്ചെത്തിയിട്ടും കുടുങ്ങി; പാപ്പനംകോട്ടെ കടയിൽ ഷട്ടറിന്റെ പൂട്ട് തകർത്ത് മോഷണം, മാർത്താണ്ഡം സ്വദേശി അറസ്റ്റിൽ

തിരുവനന്തപുരം: പാപ്പനംകോട് പൂഴിക്കുന്നിലെ സാനിറ്ററി ഷോപ്പിൽ നടന്ന മോഷണവുമായി ബന്ധപ്പെട്ട് മാർത്താണ്ഡം സ്വദേശി ജസീമിനെ (29) നേമം പൊലീസ് അറസ്റ്റ് ചെയ്തു. സ്ഥാപനത്തിൽനിന്ന് 52,000 രൂപയും മൊബൈൽ ഫോണും നഷ്ടപ്പെട്ടതായാണ് പരാതി.

പൂഴിക്കുന്ന് ജങ്ഷനു സമീപമുള്ള സ്ഥാപനത്തിൽ ശനിയാഴ്ച പുലർച്ചെയായിരുന്നു സംഭവം. കടയുടെ ഷട്ടറിന്‍റെ പൂട്ട് പൊളിച്ച് അകത്തുകയറിയാണ് മോഷണം. മുഖം തുണികൊണ്ട് മറച്ച ഒരാൾ കടയിലെ മേശപ്പുറത്തുണ്ടായിരുന്ന വസ്തുക്കൾ പരിശോധിച്ച ദൃശ്യങ്ങൾ സിസിടിവിയിൽ പതിഞ്ഞിരുന്നു. സംഭവമറിഞ്ഞ് നേമം പൊലീസ് സ്ഥലത്തെത്തി പരിശോധന നടത്തി. പിന്നാലെ നടത്തിയ അന്വേഷണത്തിനൊടുവിലാണ് ജസീമിനെ അറസ്റ്റ് ചെയ്തത്.

കഴിഞ്ഞ ഒരാഴ്ചയ്ക്കിടെ നേമം പോലീസ് സ്റ്റേഷൻ പരിധിയിലെ വിവിധ കടകളിൽ മോഷണശ്രമങ്ങൾ നടന്നതായി റിപ്പോർട്ടുകളുണ്ട്. രണ്ട് ദിവസം മുമ്പ് പാപ്പനംകോട് തുക്കുവിളയ്ക്ക് സമീപത്തെ ടെക്സ്റ്റൈൽസ് സ്ഥാപനത്തിലും ബ്യൂട്ടി പാർലറിലും സമാനമായ സംഭവങ്ങൾ റിപ്പോർട്ട് ചെയ്തിരുന്നു. ടെക്സ്റ്റൈൽസ് സ്ഥാപനത്തിൽനിന്ന് തുണികളും പണവും നഷ്ടപ്പെട്ടതായും വിവരമുണ്ട്. ഈ സംഭവങ്ങൾ തമ്മിൽ ബന്ധമുണ്ടോയെന്ന കാര്യം വ്യക്തമല്ല. സംഭവങ്ങളിൽ പൊലീസ് അന്വേഷണം തുടരുകയാണ്.