കായൽ കാണാനാകുമോ? കോടികൾ മുടക്കാൻ തയാർ; കൊച്ചിയിൽ വീട് വാങ്ങാൻ ആഗ്രഹിക്കുന്നത് ഈ ഭാഗങ്ങളിൽ

കൊച്ചി: സംസ്ഥാനത്ത് അതിവേഗം വികസിക്കുന്ന നഗരങ്ങളിലൊന്നാണ് കൊച്ചി. ഐടി നഗരമായ കൊച്ചിയിലേക്ക് എത്തുന്ന ആളുകളുടെ എണ്ണം ഉയർന്ന തോതിലാണ്. ഐടി മേഖല ഉൾപ്പെടെയുള്ള തൊഴിൽ സാധ്യതകൾ സജീവമാണ് എന്നതാണ് കൊച്ചിയിലേക്ക് എത്താൻ ആളുകളെ പ്രേരിപ്പിക്കുന്നത്. വികസന പാതയിൽ കുതിക്കുമ്പോഴും കൊച്ചി നഗരത്തിലും സമീപ പ്രദേശങ്ങളിലും സ്വന്തമായി വീടുകളും ഫ്ലാറ്റുകളും വാങ്ങാൻ ആഗ്രഹിക്കുന്നവരുടെ എണ്ണത്തിൽ കുറവില്ലെന്നാണ് റിപ്പോർട്ടുകൾ വ്യക്തമാക്കുന്നത്.

കായൽ സൗന്ദര്യങ്ങൾക്ക് പേരുകേട്ട കൊച്ചിയിൽ ഈ ഭംഗി ആസ്വാദിക്കാനാകുന്ന വീടുകൾക്കും ഫ്ലാറ്റുകൾക്കുമാണ് ആവശ്യക്കാർ ഏറെയുള്ളതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു. കായലിന് അഭിമുഖമായുള്ള ഫ്ലാറ്റുകൾക്ക് ഡിമാൻഡ് ഉയർന്ന തോതിലാണ്. ഇതിനായി വൻ തുക ചെലവഴിക്കാൻ ആവശ്യക്കാർ ഒരുക്കമാണ്. ദിവസവും നൂറുകണക്കിനാളുക എത്തുന്ന മറൈൻ ഡ്രൈവിലും തേവരയിലുമുള്ള കായലോര സ്വത്തുക്കൾക്ക് ഞെട്ടിക്കുന്ന വിലയാണ്. ഇവിടെ ഒരു 3 BHK അപ്പാർട്ടുമെൻ്റിന് രണ്ട് മുതൽ മൂന്ന് കോടി രൂപവരെയാണ്. 4 BHK അപ്പാർട്ടുമെൻ്റിന് മൂന്ന് മുതൽ നാലുകോടി രൂപവരെ നൽകണം.