മാസപ്പടി കേസ്: കേസെടുക്കാൻ ഉത്തരവിട്ട സിംഗിൾ ബെഞ്ച് ഉത്തരവിനെതിരെ പിണറായി നൽകിയ ഹർജി ഇന്ന് പരിഗണിക്കും

തിരുവനന്തപുരം: സിഎംആർഎൽ-എക്സാലോജിക് മാസപ്പടി കേസിൽ വിജിലൻസ് അന്വേഷണത്തിന് ഉത്തരവിട്ട സിംഗിൾ ബെഞ്ച് വിധിക്കെതിരായ അപ്പീൽ ഹർജി ഹൈക്കോടതി ഇന്ന് പരിഗണിക്കും. മുഖ്യമന്ത്രി പിണറായി വിജയൻ, മകൾ വീണാ വിജയൻ, മന്ത്രി പി.എ. മുഹമ്മദ് റിയാസ് തുടങ്ങിയവരാണ് അപ്പീൽ നൽകിയിട്ടുള്ളത്.

തങ്ങളുടെ ഭാഗം കേൾക്കാതെയാണ് സിംഗിൾ ബെഞ്ച് ഉത്തരവിറക്കിയതെന്നാണ് ഹർജിക്കാരുടെ മുഖ്യവാദം. മുഖ്യമന്ത്രിയെന്ന നിലയിൽ സിഎംആർഎൽ കമ്പനിക്ക് താൻ യാതൊരുവിധ സഹായവും ചെയ്തിട്ടില്ലെന്നും പിണറായി വിജയൻ ഹർജിയിൽ വ്യക്തമാക്കുന്നു. അതേസമയം, അപ്പീൽ നിലനിൽക്കില്ലെന്നാണ് വിജിലൻസിന്റെ നിലപാട്. ഇതിനിടയിൽ, പിണറായി വിജയനടക്കമുള്ളവർക്കെതിരെ ഇതിനകം കേസെടുത്തിട്ടുണ്ടെന്ന് സർക്കാർ കോടതിയെ അറിയിച്ചിട്ടുണ്ട്. റിയാസിന്റെ സുഹൃത്തുക്കളായ വാരിഷ്, ഷൈജൽ എന്നിവരും സമാന ആവശ്യവുമായി കോടതിയെ സമീപിച്ചിട്ടുണ്ട്.

എഫ്‌ഐആറിൽ ഗുരുതര ആരോപണങ്ങൾ

സാമ്പത്തിക ഇടപാടുമായി ബന്ധപ്പെട്ട് പിണറായി വിജയന്റെ സ്വാധീനത്താൽ കപട ഇടപാടുകളാണ് നടന്നതെന്നാണ് എഫ്‌ഐആറിലെ വിവരങ്ങൾ. അന്യായമായ സാമ്പത്തിക ലാഭത്തിനുവേണ്ടി ഒന്നാം പ്രതിയായ പിണറായി വിജയൻ, മുഖ്യമന്ത്രിയായിരുന്ന കാലത്ത് അധികാരം ദുരുപയോഗം ചെയ്തുവെന്നാണ് ഏഷ്യാനെറ്റ് ന്യൂസിന് ലഭിച്ച എഫ്‌ഐആർ പകർപ്പിലുള്ളത്. പിണറായി വിജയൻ, വീണ വിജയൻ, എക്സാലോജിക് കമ്പനി എന്നിവർ ചേർന്ന് ഇതിനായി ഗൂഢാലോചന നടത്തിയെന്നും, വ്യക്തിപരവും രാഷ്ട്രീയവുമായ സ്വാധീനം ഉപയോഗിച്ചാണ് ഇവർ സാമ്പത്തിക ഇടപാടുകൾ നടത്തിയതെന്നും അന്വേഷണ റിപ്പോർട്ടിൽ വ്യക്തമാക്കുന്നു.