വീട്ടുമുറ്റത്ത് പൂ കെട്ടിയിരുന്ന സഹോദരങ്ങൾ മഴക്കോള് കണ്ടിട്ടും ജോലി തുടർന്നു; ഇരുവർക്കും ഗുരുതര പരിക്ക്; ഇടിമിന്നലിൽ നാശനഷ്ടവും അപകടവും

തിരുവനന്തപുരം/കൊല്ലം: സംസ്ഥാനത്ത് കനത്ത മഴയോടനുബന്ധിച്ചുണ്ടായ ശക്തമായ ഇടിമിന്നലിൽ വ്യാപക നാശനഷ്ടം. തിരുവനന്തപുരം ആറ്റിങ്ങലിൽ വീടിന് പുറത്ത് പൂ കെട്ടിക്കൊണ്ടിരിക്കുകയായിരുന്ന സഹോദരങ്ങൾക്ക് ഇടിമിന്നലേറ്റ് ഗുരുതര പരിക്കേറ്റു. കൊല്ലം കുളത്തൂപ്പുഴയിൽ ശക്തമായ മിന്നലിൽ നാല് വീടുകൾ ഭാഗികമായി തകർന്നു.

തിരുവനന്തപുരം കടയ്ക്കാവൂർ പഞ്ചായത്തിലെ കീഴാറ്റിങ്ങൽ മണ്ണറഭാഗത്ത് ഇന്നലെ വൈകുന്നേരം അഞ്ച് മണിയോടെയാണ് ദാരുണമായ സംഭവം. മഴക്കോള് കണ്ടിട്ടും വീടിന് പുറത്തെ വരാന്തയിലിരുന്ന് പൂ കെട്ടുന്ന ജോലി തുടരുന്നതിനിടയിലാണ് കീഴാറ്റിങ്ങൽ സ്വദേശികളായ ബിന്ദുലേഖ (53), സഹോദരൻ സതികുമാർ (60) എന്നിവർക്ക് മിന്നലേറ്റത്.

അപകടത്തിൽ ബിന്ദുലേഖയുടെ നെഞ്ചിലും കൈയിലും ഗുരുതരമായി പൊള്ളലേറ്റു. സതികുമാറിന്റെ കാലിനും പരിക്കേറ്റിട്ടുണ്ട്. ആദ്യം ആറ്റിങ്ങലിലെ സ്വകാര്യ ആശുപത്രിയിൽ പ്രവേശിപ്പിച്ച ഇരുവരെയും പരിക്ക് ഗുരുതരമായതിനെ തുടർന്ന് വിദഗ്ധ ചികിത്സയ്ക്കായി മാറ്റുകയായിരുന്നു. ബിന്ദുലേഖ തിരുവനന്തപുരത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിലും (ICU), സതികുമാർ കൊട്ടിയത്തെ സ്വകാര്യ ആശുപത്രിയിലും ചികിത്സയിലാണ്.

കൊല്ലത്ത് നാല് വീടുകൾ തകർന്നു

അതിനിടെ, കൊല്ലം കുളത്തൂപ്പുഴയിലുണ്ടായ ശക്തമായ മിന്നലിൽ സിലോൺമുക്കിലെ മൂന്നും ആറ്റിൻ കിഴക്കേക്കരയിലെ ഒന്നും ഉൾപ്പെടെ നാല് വീടുകൾക്ക് കേടുപാടുകൾ സംഭവിച്ചു. ഈ വീടുകളിലെ വൈദ്യുത വയറിംഗുകൾ പൂർണ്ണമായും കത്തിനശിച്ചു.

സിലോൺമുക്ക് സ്വദേശി സീതാലക്ഷ്മിയുടെ വീടിന്റെ ഭിത്തിയിൽ ശക്തമായ മിന്നലിൽ വിള്ളൽ വീഴുകയും തറയിലെ ടൈലുകൾ പൊട്ടിത്തെറിക്കുകയും ചെയ്തു. ആറ്റിൻ കിഴക്കേക്കരയിലെ ബാലചന്ദ്രന്റെ വീട്ടിൽ മിന്നലേറ്റുണ്ടായ സ്ഫോടനത്തിൽ കോൺക്രീറ്റ് പാളികൾ ഇളകിത്തെറിക്കുകയും വിലകൂടിയ വീട്ടുപകരണങ്ങൾ പൂർണ്ണമായി നശിക്കുകയും ചെയ്തു. ഭാഗ്യം കൊണ്ടാണ് വൻ ദുരന്തം ഒഴിവായത്.