മുൻ പോലീസ് ഡ്രൈവർ വീണ്ടും പിടിയിൽ; കരുനാഗപ്പള്ളിയിൽ നിന്ന് എംഡിഎംഎയും കഞ്ചാവും പിടിച്ചെടുത്തു

കൊല്ലം: സേനയിൽ നിന്ന് പുറത്താക്കപ്പെട്ട മുൻ പോലീസ് ഡ്രൈവർ വീണ്ടും ലഹരിമരുന്നുമായി എക്സൈസിന്റെ പിടിയിൽ. കരുനാഗപ്പള്ളി ആദിനാട് സ്വദേശി ബക്കറാണ് കൊല്ലം എക്സൈസ് സ്ക്വാഡിന്റെ മിന്നൽ പരിശോധനയിൽ കുടുങ്ങിയത്. ഇയാളുടെ വീട്ടിൽ നടത്തിയ റെയ്ഡിൽ 2.18 ഗ്രാം എംഡിഎംഎയും 21 ഗ്രാം കഞ്ചാവും പിടിച്ചെടുത്തു.

കേരള പോലീസിൽ ഡ്രൈവറായി ജോലി ചെയ്തുവരികയായിരുന്ന ബക്കർ, 26 കിലോ കഞ്ചാവ് കടത്തിയ കേസിൽ പ്രതിയായതിനെത്തുടർന്നാണ് സേനയിൽ നിന്ന് പുറത്താക്കപ്പെടുന്നത്. ജോലി നഷ്ടപ്പെട്ട ശേഷവും ഒളിവിൽ താമസിച്ച് ലഹരിവസ്തുക്കളുടെ കച്ചവടം തുടർന്നു വരികയായിരുന്നു ഇയാൾ. സ്വന്തം നാട് കേന്ദ്രീകരിച്ച് വീണ്ടും ലഹരി വിൽപന സജീവമാണെന്ന രഹസ്യവിവരത്തിന്റെ അടിസ്ഥാനത്തിലാണ് എക്സൈസ് സംഘം വീട്ടിൽ പരിശോധന നടത്തി പ്രതിയെ കസ്റ്റഡിയിലെടുത്തത്.