പിണറായി വിജയനും മുഹമ്മദ് റിയാസിനും അതിനിർണായക ദിനം; മാസപ്പടി കേസിൽ എഫ്ഐആർ രജിസ്റ്റർ ചെയ്യണമെന്ന ഹർജിയിൽ വിധി ഇന്ന്

കൊച്ചി: രാഷ്ട്രീയ കേരളം ഉറ്റുനോക്കുന്ന മാസപ്പടി കേസിൽ മുഖ്യമന്ത്രി പിണറായി വിജയനും പൊതുമരാമത്ത് മന്ത്രി പി.എ. മുഹമ്മദ് റിയാസിനുമെതിരെ എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തണമെന്ന ഹർജിയിൽ ഹൈക്കോടതി ഇന്ന് വിധി പറയും. ജസ്റ്റിസ് എ. ബദറുദ്ദീൻ അധ്യക്ഷനായ സിംഗിൾ ബെഞ്ചാണ് ഹർജിയിൽ തീർപ്പ് കൽപിക്കുന്നത്. പൊതുപ്രവർത്തകനായ കെ.എം. ഷാജഹാനാണ് ഹർജിയുമായി കോടതിയെ സമീപിച്ചത്.

കേസിൽ മുഖ്യമന്ത്രി പിണറായി വിജയൻ, മകൾ വീണ വിജയൻ, മന്ത്രി പി.എ. മുഹമ്മദ് റിയാസ് എന്നിവർക്കെതിരെ അഴിമതി നിരോധന നിയമപ്രകാരം കേസ് രജിസ്റ്റർ ചെയ്യണമെന്നാണ് എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) കോടതിയിൽ സ്വീകരിച്ച നിലപാട്. അഴിമതി ആരോപണത്തിൽ കൃത്യമായ തെളിവുകളുണ്ടെന്നും അന്വേഷണ ഏജൻസി ശേഖരിച്ച വിവരങ്ങൾ തന്നെയാണ് കൈമാറിയതെന്നും അതിനാൽ എഫ്.ഐ.ആർ രജിസ്റ്റർ ചെയ്ത് അന്വേഷണം വേണമെന്നും ഇ.ഡി വാദിച്ചു.

എന്നാൽ, വിഷയത്തിൽ നിലവിൽ പ്രാഥമിക പരിശോധന നടക്കുന്നുണ്ടെന്നും തുടക്കത്തിൽ തന്നെ എഫ്.ഐ.ആർ രജിസ്റ്റർ ചെയ്യേണ്ടതില്ലെന്നുമാണ് സർക്കാറിന് വേണ്ടി ഹാജറായ അഭിഭാഷകൻ കോടതിയിൽ നിലപാടെടുത്തത്.

അതേസമയം, മാസപ്പടി കേസിൽ കേന്ദ്ര ഏജൻസികളുടെ നീക്കം ശക്തമായതോടെ മുഖ്യമന്ത്രിക്ക് പ്രതിരോധം തീർക്കാനൊരുങ്ങുകയാണ് സി.പി.എം. കോൺഗ്രസ് ഒഴികെയുള്ള ദേശീയ തലത്തിലെ പ്രതിപക്ഷ പാർട്ടി നേതാക്കളെ പങ്കാളികളാക്കി ഒക്ടോബർ പകുതിയോടെ സംസ്ഥാനത്ത് വ്യാപക പ്രക്ഷോഭ പരിപാടികൾ സംഘടിപ്പിക്കാനാണ് പാർട്ടി തീരുമാനം.