ട്രൂത്ത് ഈസ് പവര്‍ഫുള്‍; പിണറായി പ്രതിപ്പട്ടികയില്‍ വരുമെന്ന് എത്രയോ കാലം മുമ്പ് ഞാന്‍ പറഞ്ഞതാണ്: മാത്യു കുഴല്‍നാടന്‍
Samanyu
സ്റ്റാഫ് റിപ്പോർട്ടർ
കൊച്ചി: സിഎംആര്‍എല്‍ – എക്‌സാലോജിക് മാസപ്പടി ഇടപാടില്‍ പ്രതിപക്ഷനേതാവ് പിണറായി വിജയനും മുന്‍മന്ത്രി പി എ മുഹമ്മദ് റിയാസിനുമെതിരെ കേസെടുക്കാമെന്ന ഹൈക്കോടതി ഉത്തരവില്‍ പ്രതികരണവുമായി മാത്യു കുഴല്‍നാടന്‍ എംഎല്‍എ. ഉത്തരവ് നിറഞ്ഞ ഹൃദയത്തോടെ സ്വാഗതം ചെയ്യുന്നുവെന്ന് മാത്യു കുഴല്‍നാടന്‍ പറഞ്ഞു.
ഞാന്‍ ഇതിനുവേണ്ടി പരിശ്രമിച്ചപ്പോള്‍ മൂന്ന് കോടതികളില്‍ എനിക്ക് അനുകൂലമായ ഒരു വിധി സമ്പാദിക്കാന്‍ ആയില്ല. സുപ്രീംകോടതിയില്‍ നിന്നും അന്നത്തെ കേസ് ഡിസ്മിസ് ചെയ്യുമ്പോള്‍ ഒരുപാട് ആക്ഷേപവും പരിഹാസവും നേരിടേണ്ടി വന്നു. ഇത് അവസാനമല്ല എന്ന് അന്ന് ഞാന്‍ സുപ്രീം കോടതിയുടെ വളപ്പില്‍ നിന്നുകൊണ്ട് പറഞ്ഞിരുന്നു. സത്യം ജയിക്കുന്ന ഒരു സമയം ഉണ്ടാകും. ഇത് ഇവിടെ അവസാനിപ്പിക്കുന്നില്ല എന്നും ഞാന്‍ പറഞ്ഞു. സുപ്രീംകോടതിയുടെ മുകളിലും ഒരു ദൈവം ഉണ്ടെന്ന് വിശ്വസിക്കുന്നയാളാണ് ഞാന്‍. മുകളില്‍ ഒരു കോടതി ഉണ്ടല്ലോ. ഇന്നിപ്പോള്‍ മാസപ്പടി കേസില്‍ എന്റെ ഹര്‍ജി തള്ളിയ അതേ ഹൈക്കോടതി പിണറായി വിജയനെതിരെ കേസെടുക്കണം എന്ന് നിര്‍ദ്ദേശം നല്‍കിയത് ചരിത്രത്തിന്റെ കാവ്യനീതിയായി ഞാന്‍ കാണുകയാണ്. ട്രൂത്ത് ഈസ് പവര്‍ഫുള്‍. സത്യമെന്ന് പറയുന്നത് വളരെ പവര്‍ഫുള്ളാണ് – അദ്ദേഹം പറഞ്ഞു
