സപ്ലൈക്കോ നേരിടുന്ന ബാധ്യത തീര്‍ക്കാന്‍ സംസ്ഥാന സര്‍ക്കാര്‍ ഇടപെടല്‍, 63.37 കോടി രൂപ അനുവദിച്ചു

തിരുവനന്തപുരം: നെല്ല് സംഭരണത്തിൽ സപ്ലൈക്കോ നേരിടുന്ന സാമ്പത്തിക ബാധ്യത പരിഹരിക്കാൻ സർക്കാർ ഇടപെടൽ. 2022-23 സംഭരണ വർഷത്തെ ബാധ്യത തീർക്കുന്നതിനായി 63.37 കോടി രൂപ അനുവദിച്ചതായി മന്ത്രി അനൂപ് ജേക്കബ് അറിയിച്ചു.

കേന്ദ്രസർക്കാർ നെല്ലിന്റെ ഔട്ട് ടേൺ റേഷ്യോ (ഒ.ടി.ആർ) 68 ശതമാനത്തിൽ നിന്നും 64.5 ശതമാനമായി കുറയ്ക്കാൻ തയ്യാറാകാത്തതിനെത്തുടർന്ന്, 2022-23 കാലയളവിൽ സപ്ലൈകോ വഴി നെല്ല് സംസ്കരിച്ച മില്ലുടമകൾക്കുണ്ടായ നഷ്ടം നികത്താനാണ് സംസ്ഥാന ബജറ്റ് വിഹിതത്തിൽ നിന്നും ഈ തുക അനുവദിച്ചത്.

കേന്ദ്ര മാനദണ്ഡപ്രകാരം ഒരു ക്വിന്റൽ നെല്ല് സംസ്കരിക്കുമ്പോൾ 68 കിലോ അരി ലഭിക്കണം. എന്നാൽ കേരളത്തിലെ, പ്രത്യേകിച്ച് കുട്ടനാടൻ മേഖലയിലെ നെല്ലിന്റെ പ്രത്യേകതകൾ കാരണം ഇത്രയും അരി ലഭിക്കാറില്ലെന്നും ഇത് 64.5 ശതമാനമായി കുറയ്ക്കണമെന്നുമായിരുന്നു മില്ലുടമകളുടെ പ്രധാന ആവശ്യം.

2017 സെപ്തംബറിൽ നെല്ല് സംഭരണം ആരംഭിക്കേണ്ട സമയത്ത്, നിശ്ചിത ഔട്ട് ടേൺ റേഷ്യോ ലഭിക്കാത്തതിനാൽ മില്ലുടമകൾ നെല്ലെടുക്കാൻ വിസമ്മതിച്ചിരുന്നു. തുടർന്ന്, ഒ.ടി.ആർ 64.5 ശതമാനമായി കേന്ദ്ര സർക്കാർ കുറയ്ക്കുന്നത് വരെയുള്ള സാമ്പത്തിക ബാധ്യത സംസ്ഥാന സർക്കാർ വഹിക്കുമെന്ന് 2018-ൽ ഉത്തരവ് പുറപ്പെടുവിച്ചിരുന്നു.

കേരളത്തിന്റെ പ്രത്യേക സാഹചര്യം കണക്കിലെടുത്ത് ഔട്ട് ടേൺ റേഷ്യോയിൽ മാറ്റം വരുത്താൻ കേന്ദ്ര സർക്കാരിനോട് സംസ്ഥാനം വീണ്ടും ആവശ്യപ്പെടും. കൂടാതെ, വരും വർഷങ്ങളിൽ റേഷ്യോ വ്യത്യാസംമൂലമുണ്ടാകുന്ന നഷ്ടം പഠിക്കാൻ പ്രത്യേക സമിതിയെ നിയോഗിക്കാനും തീരുമാനമായിട്ടുണ്ട്.