വോട്ട് ചോരി പ്രതിഷേധം: രമേശ് ചെന്നിത്തല ഉള്‍പ്പെടെയുള്ള നേതാക്കള്‍ ദില്ലിയിലേക്ക്; നാളെ ജില്ലകളിൽ ജനാധിപത്യ സംരക്ഷണ സദസ്സുകള്‍
Nazeema
സ്റ്റാഫ് റിപ്പോർട്ടർ
വോട്ട് ചോർച്ചയിൽ മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് രമേശ് ചെന്നിത്തലയടക്കമുള്ള കോൺഗ്രസ് നേതാക്കൾ ഡൽഹിയിലേക്ക്. പ്രക്ഷോഭത്തിന് ഐക്യദാർഢ്യം പ്രഖ്യാപിച്ച് നാളെ എല്ലാ ജില്ലകളിലും കെ.പി.സി.സി 'ജനാധിപത്യ സംരക്ഷണ സദസ്സ്' സംഘടിപ്പിക്കും.
തിരുവനന്തപുരം: വോട്ട് ചോർച്ച ആരോപണത്തിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രക്ഷോഭം ദേശീയതലത്തിലേക്ക് വ്യാപിപ്പിക്കാൻ ഒരുങ്ങി കോൺഗ്രസ്. ഇതിന്റെ ഭാഗമായി രമേശ് ചെന്നിത്തല അടക്കമുള്ള പ്രമുഖ നേതാക്കൾ ഡൽഹിയിലേക്ക് തിരിക്കും. എ.പി. അനിൽകുമാർ, പി.സി. വിഷ്ണുനാഥ്, ടി. സിദ്ധിഖ്, റോജി എം. ജോൺ തുടങ്ങിയ നേതാക്കൾ നാളെയോടെ തലസ്ഥാനത്തെത്തും.
ഡൽഹിയിൽ നടക്കുന്ന പ്രതിഷേധ സമരത്തിൽ കേരളത്തിൽ നിന്നുള്ള പരമാവധി നേതാക്കൾ പങ്കാളികളാകണമെന്ന് കഴിഞ്ഞദിവസം ഓൺ‌ലൈനായി ചേർന്ന കെ.പി.സി.സി ഭാരവാഹി യോഗം നിർദേശിച്ചു.
പ്രക്ഷോഭത്തിന് ഐക്യദാർഢ്യം പ്രഖ്യാപിച്ച് നാളെ എല്ലാ ജില്ലകളിലും 'ജനാധിപത്യ സംരക്ഷണ സദസ്സുകൾ' സംഘടിപ്പിക്കും. എസ്.ഐ.ആർ സമരത്തിന് പൂർണ ശ്രദ്ധ നൽകുന്നതിന്റെ ഭാഗമായി മറ്റ് വിഷയങ്ങളൊന്നും നിലവിൽ ചർച്ച ചെയ്യേണ്ടതില്ലെന്നാണ് പാർട്ടി നേതൃത്വത്തിന്റെ തീരുമാനം. ഡൽഹിയിലെ പ്രതിഷേധം ശക്തമാകുന്ന സാഹചര്യത്തിൽ, നാളെ ചേരാനിരുന്ന കെ.പി.സി.സി യോഗം നേരത്തെയാക്കുകയായിരുന്നു.
