പിഎസ്‌സി പരീക്ഷാ ക്രമക്കേട്, ഹൈക്കോടതിയുടെ നിർണായക നീക്കം, സർക്കാരിന് നടപടികളുമായി മുന്നോട്ട് പോകാം, ഹർജിയിൽ സ്റ്റേ അനുവദിച്ചിട്ടില്ലെന്നും ഹൈക്കോടതി

കേരള ആസൂത്രണ ബോർഡ് പരീക്ഷാ ക്രമക്കേടിൽ എഫ്ഐആർ റദ്ദാക്കണമെന്നാവശ്യപ്പെട്ട് പിഎസ്‌സി നൽകിയ ഹർജിയിൽ തുടർന്നുള്ള അന്വേഷണവുമായി മുന്നോട്ട് പോകാമെന്ന് ഹൈക്കോടതി വ്യക്തമാക്കി. ഹർജി നിലവിലുണ്ടെന്നത് കൊണ്ട് മാത്രം നടപടികൾ തടസ്സപ്പെടില്ലെന്നും സ്റ്റേ അനുവദിച്ചിട്ടില്ലെന്നും ജസ്റ്റിസ് ബദറുദ്ദീൻ വ്യക്തമാക്കി. ക്രൈംബ്രാഞ്ച് റിപ്പോർട്ടിൽ മറുപടി നൽകാൻ പിഎസ്‌സി കൂടുതൽ സമയം തേടിയതിനെത്തുടർന്ന് കേസ് രണ്ടു ദിവസത്തിന് ശേഷം പരിഗണിക്കാൻ മാറ്റി. 58 മാർക്കിന്റെ പത്ത് ചോദ്യങ്ങൾ ബോധപൂർവ്വം മൂല്യനിർണ്ണയം നടത്തിയില്ലെന്ന് ക്രൈംബ്രാഞ്ച് കോടതിയെ അറിയിച്ചു. ഇതിനിടെ പുനർമൂല്യനിർണ്ണയത്തിൽ റാങ്ക് പട്ടിക മാറിമറിഞ്ഞതായും, പരാതിക്കാരനായ ശ്യാം കൃഷ്ണൻ ഒന്നാം റാങ്ക് നേടി പുതിയ റാങ്ക് പട്ടികയുടെ അടിസ്ഥാനത്തിൽ അഡ്വൈസ് മെമ്മോ കൈപ്പറ്റിയതായും റിപ്പോർട്ടിലുണ്ട്. എന്നാൽ ക്രൈംബ്രാഞ്ച് ചോദ്യം ചെയ്യലുമായി സഹകരിക്കേണ്ടതില്ലെന്ന നിലപാടിലാണ് പിഎസ്‌സി.