സ്നേഹം പെട്ടെന്ന് ഇല്ലാതായി, 'റോ' ഉദ്യോഗസ്ഥനെന്ന് പറഞ്ഞ് പരിചയപ്പെട്ട യുവാവിനെ യുവതിയുടെ പരാതിയിൽ പൊലീസ് പിടികൂടി; സ്ഥിരം തട്ടിപ്പുകാരൻ?

മഞ്ചേരി: മാട്രിമോണി സൈറ്റുകൾ വഴി യുവതികളെ പരിചയപ്പെട്ട്, കേന്ദ്ര രഹസ്യാന്വേഷണ ഏജൻസിയായ 'റോ'യിലെ ഉന്നത ഉദ്യോഗസ്ഥനാണെന്ന് വിശ്വസിപ്പിച്ച് ലക്ഷങ്ങൾ തട്ടിയെടുത്ത യുവാവ് അറസ്റ്റിൽ. മലപ്പുറം വടക്കങ്ങര അറക്കൽ വീട്ടിൽ മുഹമ്മദ് ഷിബിലി (30) ആണ് മഞ്ചേരി പോലീസിന്റെ പിടിയിലായത്.

വിവാഹവാഗ്ദാനം നൽകി യുവതികളുടെ വിശ്വാസം നേടിയെടുത്ത ശേഷം സ്വർണ്ണവും പണവും തട്ടിയെടുത്ത് മുങ്ങുന്നതാണ് ഇയാളുടെ രീതിയെന്ന് പോലീസ് വ്യക്തമാക്കി.

മാട്രിമോണി സൈറ്റിലൂടെ പരിചയപ്പെടുന്ന യുവതികളുമായി ഫോണിലും സോഷ്യൽ മീഡിയയിലും അടുത്ത ബന്ധം സ്ഥാപിക്കുകയാണ് പ്രതിയുടെ ആദ്യ പടി. തുടർന്ന് താൻ 'റോ' ഉദ്യോഗസ്ഥനാണെന്ന് തെറ്റിദ്ധരിപ്പിച്ച് വിവാഹ വാഗ്ദാനം നൽകും. ബന്ധം ദൃഢമാകുമ്പോൾ വിവിധ സാമ്പത്തിക ബുദ്ധിമുട്ടുകൾ പറഞ്ഞ് പണം ആവശ്യപ്പെടും.

ഇത്തരത്തിൽ ഒരു യുവതിയുടെ സ്വർണാഭരണങ്ങൾ പണയം വെപ്പിച്ച് 7.70 ലക്ഷം രൂപയാണ് ഇയാൾ കൈക്കലാക്കിയത്. പണം കൈക്കലാക്കിയ ഉടൻ വിവാഹത്തിൽ നിന്ന് പിന്മാറി ബന്ധം ഉപേക്ഷിക്കുകയായിരുന്നു പതിവ്. യുവതിയുടെ പരാതിയെ തുടർന്ന് മഞ്ചേരി പോലീസ് നടത്തിയ ഊർജ്ജിതമായ അന്വേഷണത്തിലാണ് പ്രതി കുടുങ്ങിയത്.

മലപ്പുറം, പാലക്കാട്, തൃശൂർ, കോഴിക്കോട്, കണ്ണൂർ ജില്ലകളിലായി സമാനമായ നിരവധി തട്ടിപ്പുകൾ ഇയാൾ നടത്തിയിട്ടുള്ളതായി പോലീസ് കണ്ടെത്തി. ഉയർന്ന പദവികളും വ്യാജ ജോലിയും കാണിച്ച് നിരവധി യുവതികളെ ഇയാൾ കബളിപ്പിച്ചിട്ടുണ്ട്. എടവണ്ണ, വാളയാർ പോലീസ് സ്റ്റേഷൻ അതിർത്തികളിൽ ഇയാളെ മുൻപ് പിടികിട്ടാപ്പുള്ളിയായി പ്രഖ്യാപിച്ചിരുന്നതാണെന്നും പോലീസ് അറിയിച്ചു.

മഞ്ചേരി പോലീസ് ഇൻസ്പെക്ടർ ടി.ജി. ദിലീപിന്റെ നേതൃത്വത്തിൽ സബ് ഇൻസ്പെക്ടർ ശശികുമാർ, സീനിയർ സിവിൽ പോലീസ് ഓഫീസർമാരായ റിയാസ്, തൗഫീഖ്, നിഷാദ്, സാലിം, ഉബൈദ് എന്നിവരടങ്ങിയ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മാട്രിമോണി സൈറ്റുകൾ വഴി പരിചയപ്പെടുന്നവരുമായി സാമ്പത്തിക ഇടപാടുകൾ നടത്തുമ്പോൾ പൊതുജനങ്ങൾ അതീവ ജാഗ്രത പാലിക്കണമെന്ന് പോലീസ് മുന്നറിയിപ്പ് നൽകി. വ്യക്തികളുടെ ഔദ്യോഗിക പശ്ചാത്തലവും ജോലിയും കൃത്യമായി പരിശോധിച്ച ശേഷം മാത്രം ഇത്തരം ബന്ധങ്ങളിൽ മുന്നോട്ട് പോകണമെന്നും അധികൃതർ ഓർമ്മിപ്പിച്ചു.