കോടതി ഫീസായ 220 രൂപയില്ല; അവ്യക്തമായ ഫോട്ടോകോപ്പി: എസ് ഐ ആറിന് എതിരായി രാഹുൽ ഗാന്ധി സമർപ്പിച്ച ഹർ‌ജിയിൽ 14 പിഴവുകൾ

ലോക്‌സഭ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ ഇന്ത്യ മുന്നണി നേതാക്കൾ വോട്ടർ പട്ടികയിലെ കൂട്ടത്തള്ളലിനെതിരെയും സ്പെഷ്യൽ ഇന്റൻസീവ് റിവിഷനെതിരെയും (SIR) സുപ്രീം കോടതിയിൽ സമർപ്പിച്ച ഹർജിയിൽ 14 സാങ്കേതിക ന്യൂനതകൾ. ഹർജി രജിസ്ട്രി പ്രാഥമികമായി പരിശോധിച്ചപ്പോഴാണ് ഈ പിഴവുകൾ കണ്ടെത്തിയത്. ന്യൂനതകൾ പരിഹരിക്കാത്തതിനാൽ ഹർജി വാദം കേൾക്കുന്നതിനായി ഇതുവരെ ലിസ്റ്റ് ചെയ്തിട്ടില്ല.

കോടതി ഫീസായി നൽകേണ്ട തുകയിൽ 220 രൂപയുടെ കുറവുണ്ടെന്നാണ് രജിസ്ട്രി ചൂണ്ടിക്കാട്ടിയ പ്രധാന പിഴവുകളിലൊന്ന്. കൂടാതെ ഹർജിക്കാരായ ഒമ്പത് നേതാക്കളുടെ ഒപ്പോടുകൂടിയ വക്കാലത്ത് അഭാവവും, കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ തിരിച്ചറിയൽ കാർഡിന്റെ അവ്യക്തമായ ഫോട്ടോ കോപ്പിയും സാങ്കേതിക തടസ്സമായി നിൽക്കുന്നു.

സൗഗത റോയ്, അഖിലേഷ് യാദവ്, തേജസ്വി പ്രസാദ് യാദവ്, സഞ്ജയ് റാവുത്ത്, എം.എ. ബേബി, ഡി. രാജ, മഹുവ മാജി, സുപ്രിയ സുലെ, ഇ.ടി. മുഹമ്മദ് ബഷീർ എന്നീ പ്രതിപക്ഷ നേതാക്കളുടെ അംഗീകാരപത്രങ്ങളാണ് ഹർജിയോടൊപ്പം സമർപ്പിക്കാത്തത്. ഇതിനുപുറമേ, തെരഞ്ഞെടുപ്പ് കമ്മീഷൻ എസ്.ഐ.ആർ പ്രക്രിയ ആരംഭിച്ചതുമായി ബന്ധപ്പെട്ട തീരുമാനത്തിന്റെയും വോട്ടർമാരെ ഒഴിവാക്കിയ രേഖകളുടെയും പെൻഡ്രൈവിലുള്ള ഡിജിറ്റൽ പകർപ്പുകൾ കൈമാറാനും കോടതി നിർദേശിച്ചിട്ടുണ്ട്.