കായംകുളത്ത് ലഹരിവേട്ട; 13.43 കിലോ കഞ്ചാവുമായി സ്ഥിരം കുറ്റവാളി അറസ്റ്റില്‍, പിടികൂടിയത് നിരവധി കേസുകളിലെ പ്രതിയെ
Nazeema
സ്റ്റാഫ് റിപ്പോർട്ടർ
ഓപ്പറേഷൻ തൂഫാന്‍റെ ഭാഗമായി കായംകുളത്ത് നടത്തിയ പരിശോധനയിൽ 13.43 കിലോ കഞ്ചാവുമായി നിരവധി ക്രിമിനൽ കേസുകളിൽ പ്രതിയായ അൻഷാദ് (31) അറസ്റ്റിലായി. സ്കൂട്ടറിൽ പ്ലാസ്റ്റിക് ചാക്കിൽ കടത്തുകയായിരുന്ന കഞ്ചാവ് കായംകുളം പോലീസും ജില്ലാ ലഹരിവിരുദ്ധ സ്ക്വാഡും ചേർന്നാണ് പിടകൂടിയത്.
കായംകുളം: ഓപ്പറേഷൻ തൂഫാന്‍റെ ഭാഗമായി കായംകുളം പോലീസും ജില്ലാ ലഹരിവിരുദ്ധ സ്ക്വാഡും ചേർന്ന് നടത്തിയ പരിശോധനയിൽ 13.43 കിലോ കഞ്ചാവുമായി സ്ഥിരം കുറ്റവാളി അറസ്റ്റിൽ. നിരവധി ക്രിമിനൽ, എൻഡിപിഎസ് കേസുകളിൽ പ്രതിയായ കൃഷ്ണപുരം മനക്കാട്ട് ചിറയിൽ വീട്ടിൽ അൻഷാദ് (31) ആണ് പിടിയിലായത്.
ഒക്ടോബർ 11-ന് രാത്രി 11.30-ഓടെ കൃഷ്ണപുരം തോട്ടുകരയിൽ വെച്ച് സ്കൂട്ടറിൽ പ്ലാസ്റ്റിക് ചാക്കിലാക്കി കടത്തുകയായിരുന്ന കഞ്ചാവുമായാണ് ഇയാൾ പോലീസ് പിടിയിലായത്.
നർക്കോട്ടിക് സെൽ ഡിവൈഎസ്പി ബി. പങ്കജാക്ഷൻ, നർക്കോട്ടിക് സെൽ ഇൻസ്പെക്ടർ ശ്രീജിത്ത് എന്നിവരുടെ നേതൃത്വത്തിലുള്ള ജില്ലാ ലഹരിവിരുദ്ധ സ്ക്വാഡും, കായംകുളം ഡിവൈഎസ്പി രാജപ്പൻ റാവുത്തറിന്‍റെ നേതൃത്വത്തിൽ എസ്ഐ സജിത്ത്മോൻ ഉൾപ്പെട്ട കായംകുളം പോലീസും ചേർന്നാണ് പ്രതിയെ അതിവിദഗ്ധമായി പിടികൂടിയത്.
