ആഞ്ഞടിച്ച് അഭിജീത് ദീപ്കെ, 'നടന്നത് ഗൂഢാലോചന'; പിണറായിയുടേയും സ്റ്റാലിന്‍റേയും തോല്‍വി ആസൂത്രിതം

ന്യൂഡൽഹി: വോട്ടർ പട്ടികയിൽനിന്ന് ജനങ്ങളെ വ്യാപകമായി ഒഴിവാക്കുന്ന നടപടിക്ക് പിന്നിൽ വൻ ഗൂഢാലോചനയുണ്ടെന്ന് സി.ജെ.പി സ്ഥാപകൻ അഭിജീത് ദീപ്കെ. കേരളത്തിലെ പിണറായി വിജയന്റേയും തമിഴ്‌നാട്ടിലെ എം.കെ. സ്റ്റാലിന്റേയും തോൽവി ആസൂത്രിതമാണെന്നും ഇത്തരം തോൽവികൾ യാദൃച്ഛികമായി സംഭവിക്കുന്നതല്ലെന്നും അദ്ദേഹം ആരോപിച്ചു.

വോട്ടർമാരെ പട്ടികയിൽനിന്ന് ഒഴിവാക്കുന്നത് വഴി ഭരണകക്ഷിയായ ബി.ജെ.പിക്കു മാത്രമാണ് നേട്ടമുണ്ടാകുന്നത്. ജീവിച്ചിരിക്കുന്നവരെ മരിച്ചവരാക്കി മാറ്റുന്ന വിചിത്രമായ നടപടിയാണ് നടക്കുന്നതെന്നും അദ്ദേഹം ചോദിച്ചു. ഡൽഹിയിൽ പ്രതിഷേധത്തിന് അധികൃതർ അനുമതി നിഷേധിച്ചതിനെയും അദ്ദേഹം കടുത്ത ഭാഷയിൽ വിമർശിച്ചു.

"സമരം നടത്തുക എന്നത് ഭരണഘടനാപരമായ അവകാശമാണ്, ആരുടെയും ഔദാര്യമല്ല. അനുവാദം നൽകാൻ ഇത് അമിത് ഷായുടെ കുടുംബസ്വത്തല്ല. ബെംഗളൂരുവിൽ സമാധാനപരമായി പ്രതിഷേധിക്കാൻ സാധിച്ചെങ്കിൽ ഡൽഹിയിൽ മാത്രം എന്തുകൊണ്ട് അനുമതി നൽകുന്നില്ല?" -അഭിജീത് ചോദിച്ചു.

രാജ്യത്തെ യുവജനങ്ങൾ നിർഭയരാണെന്നും അറസ്റ്റ് വരിക്കാൻ തയാറായിത്തന്നെയാണ് പോരാട്ടത്തിനിറങ്ങിയിരിക്കുന്നതെന്നും അദ്ദേഹം വ്യക്തമാക്കി. ജനാധിപത്യ സംരക്ഷണത്തിനായുള്ള ഈ പോരാട്ടം സി.ജെ.പിയുടെ മാത്രം നിലനിൽപിനായുള്ളതല്ലെന്നും അദ്ദേഹം കൂട്ടിച്ചേർത്തു.

മുഖ്യ തെരഞ്ഞെടുപ്പ് കമ്മീഷണർ രാജിവെക്കണമെന്ന ആവശ്യം ഉന്നയിച്ച് സി.ജെ.പി, കോൺഗ്രസ്, മറ്റ് പ്രതിപക്ഷ സംഘടനകൾ, വിദ്യാർഥി സംഘടനകൾ എന്നിവരുടെ നേതൃത്വത്തിൽ രാജ്യതലസ്ഥാനത്ത് കഴിഞ്ഞ മൂന്ന് ദിവസമായി ശക്തമായ പ്രതിഷേധ സമരം തുടരുകയാണ്.