പോരാട്ടം തുടരും, ഇന്ത്യ സഖ്യത്തിന്‍റെ സുപ്രീം കോടതിയിലേക്കുള്ള പ്രതിഷേധം വിജയിപ്പിച്ചതില്‍ നന്ദി അറിയിച്ച് രാഹുൽ ഗാന്ധി

ന്യൂഡൽഹി: ഇന്ത്യ സഖ്യത്തിന്റെ നേതൃത്വത്തിൽ സുപ്രീം കോടതിയിലേക്ക് നടത്തിയ പ്രതിഷേധ മാർച്ചും റാലിയും വിജയകരമാക്കിയതിൽ പങ്കെടുത്ത എല്ലാവർക്കും കോൺഗ്രസ് നേതാവ് രാഹുൽ ഗാന്ധി നന്ദി അറിയിച്ചു. ഭരണഘടന സംരക്ഷിക്കുന്നതിനുവേണ്ടിയുള്ള ഈ പോരാട്ടം തുടരുമെന്നും എല്ലാ പ്രതിഷേധങ്ങളും ഒരേ ലക്ഷ്യത്തിലേക്കുള്ളതാണെന്നും അദ്ദേഹം വ്യക്തമാക്കി.

കോൺഗ്രസ് അധ്യക്ഷൻ മല്ലികാർജ്ജുൻ ഖർഗെ, കർണാടക ഉപമുഖ്യമന്ത്രി ഡി.കെ. ശിവകുമാർ, തെലങ്കാന മുഖ്യമന്ത്രി രേവന്ത് റെഡ്ഢി, സി.പി.എം. പൊളിറ്റ് ബ്യൂറോ അംഗം എം.എ. ബേബി, സമാജ്‌വാദി പാർട്ടി അധ്യക്ഷൻ അഖിലേഷ് യാദവ്, ആർ.ജെ.ഡി. നേതാവ് തേജസ്വി യാദവ്, യോഗേന്ദ്ര യാദവ്, നേഹ ബോറ തുടങ്ങിയ പ്രമുഖ നേതാക്കൾ സുപ്രീം കോടതി മാർച്ചിൽ അണിനിരന്നു. രാജ്യതലസ്ഥാനത്ത് വിവിധ ഭാഗങ്ങളിൽ നിന്നെത്തിയ ആയിരക്കണക്കിന് പ്രവർത്തകരുടെ സാന്നിധ്യം കൊണ്ട് ഡൽഹി ഇന്നും കനത്ത സംഘർഷഭരിതമായിരുന്നു.

സമാധാനപരമായി പ്രതിഷേധിക്കാനെത്തിയ രാജ്യത്തെ യുവജനങ്ങൾക്ക് നേരെ പൊലീസിന്റെയും ബി.ജെ.പി. ഗുണ്ടകളുടെയും ഭാഗത്തുനിന്നും ഉണ്ടായ ക്രൂരമായ അതിക്രമങ്ങൾ അംഗീകരിക്കാനാകില്ലെന്ന് രാഹുൽ ഗാന്ധി കുറ്റപ്പെടുത്തി. രാജ്യത്തെ യുവജനങ്ങളും പൗരാവകാശ സംഘടനകളും പ്രതിപക്ഷ കക്ഷികളും രാഷ്ട്രീയ-ജാതി-മത ഭേദമന്യേ ഭരണഘടന സംരക്ഷിക്കാനായി തങ്ങളോടൊപ്പം തെരുവിൽ അണിനിരക്കണമെന്ന് അദ്ദേഹം അഭ്യർത്ഥിച്ചു.