ഗ്യാനേഷ് കുമാറിൻ്റെ രാജി ആവശ്യപ്പെട്ട് പ്രതിഷേധം നടക്കാനിരിക്കെ ആയിരത്തിലധികം പേർ ഡൽഹിയിൽ കസ്റ്റഡിയിൽ; നടപടി തുടങ്ങിയത് പുലർച്ചെ

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് കോക്ക്റോച്ച് ജനതാ പാർട്ടിയും ഇടത് വിദ്യാർത്ഥി സംഘടനകളും സംയുക്തമായി സംഘടിപ്പിക്കുന്ന പ്രതിഷേധത്തിന് മുന്നോടിയായി തലസ്ഥാനത്ത് വ്യാപക അറസ്റ്റ്. ശനിയാഴ്ച പുലർച്ചെയോടെ ആരംഭിച്ച കൂട്ട കസ്റ്റഡി നടപടികളിൽ ഇതുവരെ ആയിരത്തിലധികം പേരെയാണ് ഡൽഹി പോലീസ് കരുതൽ തടങ്കലിലാക്കിയത്.

ജന്തർ മന്തറിൽ പ്രഖ്യാപിച്ച പ്രതിഷേധ മാർച്ചിൻ്റെ പശ്ചാത്തലത്തിൽ നഗരത്തിൽ സുരക്ഷ സന്നാഹം അതീവ കർശനമാക്കിയിട്ടുണ്ട്.

വെള്ളിയാഴ്ച അർദ്ധരാത്രി വരെ ലഭിച്ച ഔദ്യോഗിക കണക്കുകൾ പ്രകാരം, കസ്റ്റഡിയിലായവരിൽ ഭൂരിഭാഗവും സൗത്ത് ഈസ്റ്റ് ഡൽഹിയിൽ നിന്നുള്ളവരാണ്. ഇതിൽ 250-ഓളം പേർ മാത്രen ഷഹീൻ ബാഗ് പ്രദേശത്ത് നിന്നുള്ളവരാണെന്ന് അധികൃതർ വ്യക്തമാക്കി. 2020-ലെ പൗരത്വ ഭേദഗതി നിയമത്തിനെതിരെയുള്ള പ്രക്ഷോഭങ്ങൾക്ക് വേദിയായ ഷഹീൻ ബാഗിൽ അതീവ ജാഗ്രതയാണ് പോലീസ് പുലർത്തുന്നത്.

പ്രതിഷേധ പ്രകടനങ്ങൾ കണക്കിലെടുത്ത് നഗരത്തിലുടനീളം കനത്ത കാവൽ ഏർപ്പെടുത്തിയിട്ടുണ്ട്. ഡൽഹി അതിർത്തികളിലും പ്രധാന നഗരവീഥികളിലും ബാരിക്കേഡുകൾ സ്ഥാപിച്ച് വാഹനങ്ങളും യാത്രക്കാരും കർശന പരിശോധനയ്ക്ക് ശേഷമാണ് കടത്തിവിടുന്നത്. സംഘർഷാവസ്ഥ ഒഴിവാക്കാൻ നഗരത്തിന്റെ വിവിധ ഭാഗങ്ങളിൽ അർദ്ധസൈനിക വിഭാഗങ്ങളെയും വിന്യസിച്ചിട്ടുണ്ട്.