'ജീവനക്കാരോട് മാപ്പപേക്ഷിക്കുന്നു', ശമ്പളവർധനവ് ഉപേക്ഷിക്കുന്നുവെന്ന് സോഹോ; പിരിച്ചുവിടൽ ഒഴിവാക്കാൻ ശ്രമിക്കുമെന്ന് ശ്രീധർ വെമ്പു

ചെന്നൈ: ആർട്ടിഫിഷ്യൽ ഇന്റലിജൻസ് (എഐ) അടിസ്ഥാനസൗകര്യങ്ങൾക്കായുള്ള ചെലവ് കുത്തനെ ഉയർന്നതും സോഫ്റ്റ്‌വെയർ മേഖലയിലെ മാന്ദ്യവും കാരണം ജീവനക്കാർക്ക് ഇത്തവണ വാർഷിക ശമ്പളവർധനവ് നൽകില്ലെന്ന് പ്രമുഖ ഇന്ത്യൻ ഐടി സ്ഥാപനമായ സോഹോ കോർപ്പറേഷൻ. കടുത്ത പ്രതിസന്ധിക്കിടയിലും കൂട്ടപ്പിരിച്ചുവിടലുകൾ പരമാവധി ഒഴിവാക്കാനാണ് തങ്ങളുടെ ശ്രമമെന്ന് കമ്പനി സ്ഥാപകൻ ശ്രീധർ വെമ്പു വ്യക്തമാക്കി.

സോഷ്യൽ മീഡിയ പ്ലാറ്റ്‌ഫോമായ എക്സിലൂടെയാണ് അദ്ദേഹം കമ്പനിയുടെ നിലപാട് വിശദീകരിച്ചത്. ഡാറ്റാ സെന്ററുകൾക്കായുള്ള സെർവറുകളുടെ വില വർധിച്ചതും എഐ സാങ്കേതികവിദ്യയുടെ ഉപയോഗച്ചെലവ് കൂടിയതുമാണ് കമ്പനിയെ പ്രതിസന്ധിയിലാക്കിയത്. ഇതിനുപുറമെ, ആഗോളതലത്തിലെ ഭൗമരാഷ്ട്രീയ പിരിമുറുക്കങ്ങളും നിലവിലെ സാഹചര്യത്തിന് ആക്കം കൂട്ടിയതായി അദ്ദേഹം ചൂണ്ടിക്കാട്ടി.

"സോഫ്റ്റ്‌വെയർ രംഗത്തിന്റെ ഭാവി ഇപ്പോൾ അനിശ്ചിതത്വത്തിലാണ്. ഒപ്പം എഐ ഉപയോഗം കമ്പനിയുടെ ചെലവുകൾ വൻതോതിൽ വർധിപ്പിച്ചിട്ടുണ്ട്. ഇതിന്റെ ഭാഗമായി മാർക്കറ്റിംഗ് ബജറ്റ് ഞങ്ങൾ വെട്ടിച്ചുരുക്കിയിട്ടുണ്ട്. ജീവനക്കാർക്ക് ഇത്തവണ പതിവുപോലെ ശമ്പളവർധനവ് നൽകാൻ കഴിയില്ല. ഈ തീരുമാനത്തിൽ ഞാൻ ജീവനക്കാരോട് മാപ്പപേക്ഷിക്കുന്നു," ശ്രീധർ വെമ്പു എക്സിൽ കുറിച്ചു.

കമ്പനിയിൽ നിന്നും കൂട്ടപ്പിരിച്ചുവിടലുകൾ ഒഴിവാക്കാനാണ് മുൻഗണന നൽകുന്നതെങ്കിലും, ഐടി മേഖലയിലെ മൊത്തത്തിലുള്ള തൊഴിൽ സാധ്യതകൾ മങ്ങിക്കൊണ്ടിരിക്കുകയാണെന്ന് അദ്ദേഹം ഓർമ്മിപ്പിച്ചു. കഴിഞ്ഞ 18 മാസമായി സോഹോ പുതിയ ജീവനക്കാരെ നിയമിക്കുന്നില്ല. നിലവിലെ പ്രതിസന്ധിയുടെ ഗൗരവം ജീവനക്കാർ മനസ്സിലാക്കുന്നുണ്ടെന്നും അതിൽ നന്ദിയുണ്ടെന്നും അദ്ദേഹം പറഞ്ഞു. കമ്പനിയെ പുതിയ കാലത്തിന് അനുയോജ്യമായ രീതിയിൽ പുനഃക്രമീകരിക്കാനുള്ള ശ്രമങ്ങൾ നടന്നു വരികയാണെന്നും, ഇതിന്റെ പൂർണ്ണമായ ഫലം ദൃശ്യമാവാൻ മൂന്ന് മുതൽ അഞ്ച് വർഷം വരെ സമയമെടുക്കുമെന്നും ശ്രീധർ വെമ്പു കൂട്ടിച്ചേർത്തു.