'നേതാക്കളെ കാണുന്നത് ഉചിതമല്ല'; ചീഫ് ജസ്റ്റിസുമായുള്ള കൂടിക്കാഴ്ചയ്ക്ക് പ്രതിപക്ഷത്തിന് അനുമതിയില്ല, ഇന്നും ദില്ലി മെട്രോയിൽ നിയന്ത്രണം

ന്യൂഡൽഹി: ചീഫ് ജസ്റ്റിസുമായുള്ള കൂടിക്കാഴ്ചയ്ക്ക് പ്രതിപക്ഷ നേതാക്കൾക്ക് അനുമതി നിഷേധിച്ചു. പ്രതിപക്ഷം നൽകാൻ ഉദ്ദേശിച്ച നിവേദനം സുപ്രീം കോടതി ചീഫ് ജസ്റ്റിസ് നിരസിച്ചു. സുപ്രീം കോടതിയുടെ പരിഗണനയിലുള്ള വിഷയമായതിനാൽ നേതാക്കളെ കാണുന്നത് ഉചിതമല്ലെന്ന് ചീഫ് ജസ്റ്റിസ് വ്യക്തമാക്കി.

മൗലികാവകാശങ്ങൾ സംരക്ഷിക്കാൻ കോടതിയുടെ വാതിലുകൾ എപ്പോഴും തുറന്നു കിടക്കുന്നുണ്ടെങ്കിലും, പ്രതിപക്ഷം ഉന്നയിക്കുന്ന വിഷയങ്ങൾക്ക് ഭരണപരമായ പരിഹാരമാണ് വേണ്ടതെന്നും ഇക്കാര്യത്തിൽ വ്യക്തിപരമായി ഒന്നും ചെയ്യാനില്ലെന്നും ചീഫ് ജസ്റ്റിസ് കത്തിലൂടെ അറിയിച്ചു. പ്രതിപക്ഷം ഔദ്യോഗികമായി ഹർജി നൽകുകയാണെങ്കിൽ നിലവിലുള്ള കേസിനൊപ്പം അടിയന്തരമായി പരിഗണിക്കാമെന്നും അദ്ദേഹം വ്യക്തമാക്കി. ഇതിനിടെ, വൈകിട്ട് നടക്കുന്ന ഇന്ത്യ സഖ്യത്തിന്റെ സുപ്രീം കോടതി മാർച്ച് തടയാൻ സർക്കാർ നീക്കം ആരംഭിച്ചിട്ടുണ്ട്.

ഇടത് വിദ്യാർഥി സംഘടനകളുടെ പ്രക്ഷോഭം ഇന്ന്; നിയമസഭയിൽ പ്രമേയം

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ദില്ലിയിൽ ഇന്നും ഇടത് വിദ്യാർഥി സംഘടനകളുടെ ശക്തമായ പ്രക്ഷോഭം തുടരും. ജന്തർ മന്തറിൽ സമരത്തിന് അനുമതി തേടി സി.ജെ.പി വീണ്ടും പൊലീസിനെ സമീപിക്കും. ഇതിന്റെ ഭാഗമായി ഇന്ന് ഇന്ത്യ സഖ്യയോഗവും ചേരുന്നുണ്ട്.

അതേസമയം, മുഖ്യ തെരഞ്ഞെടുപ്പ് കമ്മീഷണറെ നീക്കണമെന്നാവശ്യപ്പെടുന്ന പ്രമേയം മുഖ്യമന്ത്രി ഇന്ന് നിയമസഭയിൽ അവതരിപ്പിക്കും. എൽ.ഡി.എഫ് പ്രമേയത്തെ പിന്തുണയ്ക്കുമ്പോൾ ബി.ജെ.പി ശക്തമായി എതിർക്കും. ഗ്യാനേഷ് കുമാറിന്റെ കീഴിൽ നടന്ന തെരഞ്ഞെടുപ്പുകൾ അട്ടിമറിയാണെങ്കിൽ മുഖ്യമന്ത്രി രാജിവെക്കണമെന്നാണ് ബി.ജെ.പിയുടെ ആവശ്യം. ഇത് ഉന്നയിച്ച് ഇന്ന് ബി.ജെ.പി നിയമസഭാ മാർച്ചും പ്രഖ്യാപിച്ചിട്ടുണ്ട്.