പശ്ചിമബംഗാളിൽ രണ്ടിടത്തും ബിജെപി മുന്നിൽ; നന്ദിഗ്രാമിൽ 60000 വോട്ടിന്റെ ലീഡ്, അസമിലെ ലോക്സഭാ സീറ്റിൽ കോൺഗ്രസ് മൂന്നാം സ്ഥാനത്ത്

ന്യൂഡൽഹി: അസമിലെ ലോക്സഭാ ഉപതെരഞ്ഞെടുപ്പിലും പശ്ചിമ ബംഗാളിലെ നിയമസഭാ ഉപതെരഞ്ഞെടുപ്പുകളിലും ബി.ജെ.പിക്ക് വൻ മുന്നേറ്റം. അസമിലെ നഗാവ് ലോക്സഭാ മണ്ഡലത്തിൽ കോൺഗ്രസിനെ മൂന്നാം സ്ഥാനത്തേക്ക് തള്ളി ബി.ജെ.പി സ്ഥാനാർഥി വൻ ലീഡ് നേടി. പശ്ചിമ ബംഗാളിൽ ശ്രദ്ധേയമായ നന്ദിഗ്രാം അടക്കം രണ്ട് സീറ്റുകളിലും ബി.ജെ.പി മുന്നിട്ടുനിൽക്കുകയാണ്.

​തെരഞ്ഞെടുപ്പ് കമീഷനെതിരെ ശക്തമായ പ്രതിഷേധങ്ങൾ തെരുവിൽ അലയടിക്കുന്നതിനിടയിലാണ് വോട്ടെണ്ണൽ ഫലങ്ങളിൽ ഭരണകക്ഷി അനുകൂല തരംഗം ദൃശ്യമാകുന്നത്.

​അസമിൽ കോൺഗ്രസിന് വൻ തിരിച്ചടി

​2024ൽ കോൺഗ്രസ് രണ്ടു ലക്ഷത്തിലധികം വോട്ടിന്റെ ഭൂരിപക്ഷത്തിൽ വിജയിച്ച അസമിലെ നഗാവ് ലോക്സഭാ സീറ്റിലാണ് പാർട്ടി കടുത്ത തിരിച്ചടി നേരിടുന്നത്. കോൺഗ്രസ് എം.പി പ്രദ്യുത് ബർദലോയ് രാജിവെച്ച് ബി.ജെ.പിയിൽ ചേർന്നതിനെ തുടർന്നാണ് ഇവിടെ ഉപതെരഞ്ഞെടുപ്പ് വേണ്ടിവന്നത്.

​പകുതി റൗണ്ടുകൾ എണ്ണിത്തീർന്നപ്പോൾ ബി.ജെ.പിയുടെ ദേബാശിഷ് ശർമ 85,000 വോട്ടിന്റെ ഭൂരിപക്ഷത്തിലാണ് മുന്നേറുന്നത്. എ.ഐ.യു.ഡി.എഫിന്റെ ബദറുദ്ദീൻ അജ്മൽ രണ്ടാം സ്ഥാനത്തുണ്ട്. എന്നാൽ കഴിഞ്ഞ തവണ വൻ വിജയം നേടിയ കോൺഗ്രസിന്റെ സ്ഥാനാർഥി സിമോണി ബോറ വലിയ വോട്ടുവ്യത്യാസത്തിൽ മൂന്നാം സ്ഥാനത്തേക്ക് പിന്തള്ളപ്പെട്ടു. ഈ മണ്ഡലം പിടിച്ചെടുക്കുന്നതോടെ ലോക്സഭയിൽ ബി.ജെ.പിയുടെ അംഗസംഖ്യ 241 ആയി ഉയരും.

​നന്ദിഗ്രാമിലും ബി.ജെ.പി ലീഡ്

​പശ്ചിമ ബംഗാളിൽ മുഖ്യമന്ത്രി സുവേന്ദു അധികാരി രാജിവെച്ചതിനെ തുടർന്നാണ് നന്ദിഗ്രാമിൽ ഉപതെരഞ്ഞെടുപ്പ് നടന്നത്. കഴിഞ്ഞ തവണ ഭവാനിപൂരിലും നന്ദിഗ്രാമിലും മത്സരിച്ചു ജയിച്ച സുവേന്ദു, തുടർന്ന് നന്ദിഗ്രാം ഒഴിയുകയായിരുന്നു. കൊല്ലപ്പെട്ട തന്റെ പി.എ ചന്ദ്രനാഥ് രഥിയുടെ മാതാവ് ഹസീറാണി രഥിക്കാണ് സുവേന്ദു ഇവിടെ സീറ്റ് നൽകിയത്.

​എണ്ണിയ റൗണ്ടുകളിൽ, കഴിഞ്ഞ തവണ സുവേന്ദു അധികാരി നേടിയ ഭൂരിപക്ഷത്തിന്റെ ആറിരട്ടിയോളമാണ് ഹസീറാണിയുടെ ലീഡ്. ഇവിടെ കോൺഗ്രസ് സ്ഥാനാർഥി മിലൻ പ്രധാനാണ് രണ്ടാം സ്ഥാനത്ത്. തൃണമൂൽ കോൺഗ്രസ് സ്ഥാനാർഥി പിന്മാറിയതിനെ തുടർന്ന് മമത ബാനർജി കോൺഗ്രസിന് പിന്തുണ പ്രഖ്യാപിച്ചിരുന്നു. പഴയ കേസിൽ സംസ്ഥാന സർക്കാർ അറസ്റ്റ് ചെയ്ത് ജയിലിലടച്ച മിലൻ പ്രധാൻ, വോട്ടെടുപ്പിന് തൊട്ടുമുമ്പാണ് ഹൈകോടതി ഇടപെടലിലൂടെ പുറത്തിറങ്ങിയത്.

​അതേസമയം, 70 ശതമാനത്തോളം മുസ്‍ലിം വോട്ടർമാരുള്ള രജി നിയമസഭാ സീറ്റിലും ബി.ജെ.പി തന്നെയാണ് മുന്നിൽ. കഴിഞ്ഞ തവണ 60,000 വോട്ടിന് വിജയിച്ച എ.ജെ.യു.പിയുടെ ഹുമയൂൺ കബീർ രാജിവെച്ച ഒഴിവിലാണ് ഇവിടെ തെരഞ്ഞെടുപ്പ് നടന്നത്. എ.ജെ.യു.പി സ്ഥാനാർഥിയാണ് രണ്ടാം സ്ഥാനത്തുള്ളത്. മമത ബാനർജിയുമായി തെറ്റിപ്പിരിഞ്ഞ് പുതിയ പാർട്ടി രൂപീകരിച്ച ഋതബ്രത ബാനർജി പക്ഷത്തിന് രണ്ട് മണ്ഡലങ്ങളിലും സ്വാധീനമുണ്ടാക്കാൻ സാധിച്ചില്ല.