ജെഎസ്ഡബ്ല്യുവിന്റെ പുതിയ എസ്‌യുവി വരുന്നു; വിപണി ഞെട്ടും!

ഇന്ത്യൻ വാഹന വിപണിയിൽ സ്വതന്ത്ര കാർ നിർമാതാക്കളായി അരങ്ങേറ്റം കുറിക്കാൻ ജെ.എസ്.ഡബ്ല്യു മോട്ടോഴ്‌സ് (JSW Motors). ചൈനീസ് വാഹന നിർമാതാക്കളായ ചെറി ഓട്ടോമൊബൈലുമായി (Chery Automobile) സഹകരിച്ചുള്ള ആദ്യ പ്ലഗ്-ഇൻ ഹൈബ്രിഡ് എസ്‌യുവിയായ 'ജെ.എസ്.ഡബ്ല്യു കോംബാറ്റ്' (JSW Combat) ഡിസംബർ 4ന് ഇന്ത്യയിൽ അവതരിപ്പിക്കും.

ആഗോള വിപണിയിലെ ജനപ്രിയ മോഡലായ ജെറ്റ്‌ടൂർ ടി2 അടിസ്ഥാനമാക്കിയാണ് പുതിയ വാഹനം പുറത്തിറക്കുന്നത്. മഹാരാഷ്ട്രയിലെ ഛത്രപതി സംഭാജിനഗറിലുള്ള ജെ.എസ്.ഡബ്ല്യു പ്ലാന്റിലാണ് ഈ അഞ്ച് സീറ്റർ പ്രീമിയം എസ്‌യുവി അസംബിൾ ചെയ്യുന്നത്. അടുത്ത വർഷം ആദ്യത്തോടെ വാഹനം നിരത്തിലെത്തുമെന്നാണ് പ്രതീക്ഷിക്കുന്നത്.

പ്രതീക്ഷിക്കുന്ന വില

വാഹനത്തിന്റെ ഔദ്യോഗിക വില പ്രഖ്യാപിച്ചിട്ടില്ലെങ്കിലും, എക്സ്-ഷോറൂം വില അടിസ്ഥാന വകഭേദത്തിന് ഏകദേശം 30 ലക്ഷം രൂപയും ഉയർന്ന വകഭേദത്തിന് 50 ലക്ഷം രൂപയും വരെയാകാം എന്നാണ് വിലയിരുത്തൽ. ഈ വിഭാഗത്തിൽ ഹോണ്ട ഇസെഡ്ആർ-വിയായിരിക്കും കോംബാറ്റിന്റെ പ്രധാന എതിരാളി.

എൻജിനും റേഞ്ചും

1.5 ലിറ്റർ ഡയറക്ട് ഇഞ്ചക്ഷൻ ടർബോ പെട്രോൾ എൻജിനും രണ്ട് ഇലക്ട്രിക് മോട്ടോറുകളും 26.7 കിലോവാട്ട് അവർ ബാറ്ററിയും അടങ്ങിയതാണ് ഇതിന്റെ പ്ലഗ്-ഇൻ ഹൈബ്രിഡ് സംവിധാനം.

• മൊത്തം കരുത്ത്: 381 ബി.എച്ച്.പി

• ടോർക്ക്: 610 എൻ.എം

• ഹൈബ്രിഡ് ട്രാൻസ്മിഷൻ: 3-സ്പീഡ് പ്രത്യേക ഹൈബ്രിഡ് ഗിയർബോക്സ്.

• റേഞ്ച്: പെട്രോളും വൈദ്യുതിയും ചേർത്ത് 1,000 കിലോമീറ്ററിലധികം ഡ്രൈവിങ് റേഞ്ച് വാഗ്ദാനം ചെയ്യുന്നു. ബാറ്ററിയിൽ മാത്രം 139 കിലോമീറ്റർ സഞ്ചരിക്കാനാകുമെന്നാണ് കണക്കാക്കുന്നത്. ഇന്ത്യയിൽ ഫ്രണ്ട് വീൽ ഡ്രൈവ് (FWD) പതിപ്പായിരിക്കും പ്രധാനമായും എത്തുക.

ചാർജിങ് സൗകര്യം

• 6.6 കിലോവാട്ട് എസി ചാർജർ: ബാറ്ററി 30 ശതമാനത്തിൽനിന്ന് പൂർണ്ണമായി ചാർജ് ചെയ്യാൻ ഏകദേശം 3 മണിക്കൂർ വേണം.

• 50 കിലോവാട്ട് ഡിസി ഫാസ്റ്റ് ചാർജർ: 30 ശതമാനത്തിൽനിന്ന് 80 ശതമാനത്തിലെത്താൻ വെറും 27 മിനിറ്റ് മതിയെന്നാണ് ചൈനീസ് പതിപ്പിന്റെ കണക്കുകൾ വ്യക്തമാക്കുന്നത്.

പ്രീമിയം ഫീച്ചറുകൾ

ആധുനിക സാങ്കേതികവിദ്യയും ആഡംബരവും ഒത്തിണങ്ങിയ ഫീച്ചറുകളാണ് കോംബാറ്റിൽ ഉൾപ്പെടുത്തിയിരിക്കുന്നത്.

• 15.6 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം

• വയർലെസ് ആൻഡ്രോയ്ഡ് ഓട്ടോ, ആപ്പിൾ കാർപ്ലേ

• 10.6 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ

• ജെ.എസ്.ഡബ്ല്യു ബ്രാൻഡിങ്ങോടുകൂടിയ 4-സ്പോക്ക് സ്റ്റിയറിങ് വീൽ

• പനോരമിക് സൺറൂഫ്, 540 ഡിഗ്രി ക്യാമറ

• അഡാപ്റ്റീവ് ക്രൂയിസ് കൺട്രോൾ

• ഇലക്ട്രിക്കായി ക്രമീകരിക്കാവുന്ന വെന്റിലേറ്റഡ് മുൻസീറ്റുകൾ, ആംബിയന്റ് ലൈറ്റിങ്

വാഹനത്തിന്റെ കൃത്യമായ സാങ്കേതിക വിവരങ്ങളും ബുക്കിങ് തീയതിയും ഡിസംബറിലെ ഔദ്യോഗിക അവതരണത്തോടുകൂടി കമ്പനി പുറത്തുവിടും.