ആർഡിയേക്കാൾ ഉയർന്ന ലാഭവിഹിതം, ഔദ്യോഗിക പ്രഖ്യാപനവുമായി മുഖ്യമന്ത്രി വി ഡി സതീശൻ; കെഎസ്എഫ്ഇ പിങ്ക് ചിട്ടികൾക്ക് തുടക്കമായി

തിരുവനന്തപുരം: വനിതകൾക്കും ട്രാൻസ്‌ജെൻഡർ വ്യക്തികൾക്കുമായി കെഎസ്എഫ്ഇ അവതരിപ്പിച്ച പുതിയ സമ്പാദ്യ പദ്ധതിയായ 'പിങ്ക് ചിട്ടി'യുടെ ഔദ്യോഗിക പ്രഖ്യാപനം നടന്നു. നിയമസഭാ മീഡിയാ റൂമിൽ നടന്ന ചടങ്ങിൽ മുഖ്യമന്ത്രി വി.ഡി. സതീശൻ പദ്ധതിയുടെ പ്രഖ്യാപനം നിർവഹിച്ചു.

സർക്കാരിന്റെ സ്ത്രീ ശാക്തീകരണ നയങ്ങളുടെ ഭാഗമായി രൂപീകരിച്ചിരിക്കുന്ന പ്രത്യേക സമ്പാദ്യ പദ്ധതിയാണ് പിങ്ക് ചിട്ടികൾ. ദൈനംദിന സമ്പാദ്യത്തിലൂടെ മികച്ചൊരു ശീലം വളർത്തിയെടുക്കാനും, സുരക്ഷിതമായ നിക്ഷേപത്തിലൂടെ സാമ്പത്തിക സ്വാശ്രയത്വം ഉറപ്പുവരുത്താനുമാണ് പദ്ധതി ലക്ഷ്യമിടുന്നത്.

ചടങ്ങിൽ 2025-26 സാമ്പത്തിക വർഷത്തെ കെഎസ്എഫ്ഇ ഗ്യാരന്റി കമ്മിഷന്റെ രണ്ടാം ഗഡുവായ 110.04 കോടി രൂപ മാനേജിങ് ഡയറക്ടർ പി.എൻ. അഭിലാഷ് മുഖ്യമന്ത്രിക്ക് കൈമാറി. കെഎസ്എഫ്ഇ ജനറൽ മാനേജർമാരായ എസ്. ശരത് ചന്ദ്രൻ, പി. ശ്രീകുമാർ, കമ്പനി സെക്രട്ടറി എമിൽ അലക്‌സ് തുടങ്ങിയവർ സന്നിഹിതരായി.

• പ്രതിമാസ അടവ്: 1,500 രൂപ മുതൽ 5,000 രൂപ വരെയുള്ള തവണകളിൽ ചിട്ടിയിൽ അംഗമാകാം.

• കാലാവധി: 30 മാസം മുതൽ 60 മാസം വരെയുള്ള ഹ്രസ്വ, മധ്യകാല കാലാവധികളാണ് ഉള്ളത്.

• സർക്കാർ സുരക്ഷ: കേരള സർക്കാരിന്റെ 100 ശതമാനം ഗ്യാരണ്ടിയുള്ള സുരക്ഷിത പദ്ധതിയാണിത്.

• ഉയർന്ന ലാഭവിഹിതം: ബാങ്ക് ആവർത്തന നിക്ഷേപങ്ങളേക്കാൾ (ആർഡി) ഉയർന്ന ലാഭവിഹിതമാണ് പിങ്ക് ചിട്ടി വാഗ്ദാനം ചെയ്യുന്നത്.

• ക്യാഷ്ബാക്ക് ആനുകൂല്യം: കൃത്യസമയത്ത് തവണകൾ മുടങ്ങാതെ അടയ്ക്കുന്ന വരിക്കാർക്ക് 10, 30, 59 എന്നീ തവണകൾ പൂർത്തിയാകുമ്പോൾ 500 രൂപ വീതം നേരിട്ട് അക്കൗണ്ടിലേക്ക് ക്യാഷ്ബാക്ക് ലഭിക്കും. ഇതുവഴി ആകെ 1,500 രൂപ വരെ ക്യാഷ്ബാക്ക് നേടാം.

പരമ്പരാഗത കെഎസ്എഫ്ഇ ചിട്ടികളുടെ അതേ വ്യവസ്ഥകളിലാണ് പിങ്ക് ചിട്ടിയും പ്രവർത്തിക്കുന്നത്. അംഗങ്ങൾക്ക് പ്രതിമാസം ലേലത്തിലൂടെയോ നറുക്കെടുപ്പിലൂടെയോ തുക കൈപ്പറ്റാം. ലേലക്കിഴിവിൽ ഫോർമാൻ കമ്മീഷൻ കുറച്ചുള്ള ലാഭവിഹിതം ഓരോ മാസത്തെയും തവണയിൽനിന്ന് കുറച്ചുകിട്ടുമെന്നതിനാൽ വരിക്കാർക്ക് യഥാർഥ പ്രതിമാസ തുകയേക്കാൾ കുറഞ്ഞ തുക നൽകിയാൽ മതിയാകും. ദൈനംദിന ചെലവുകളിൽനിന്ന് ചെറിയ തുകകൾ മിച്ചംപിടിച്ച് വലിയൊരു സമ്പാദ്യം കെട്ടിപ്പടുക്കാൻ ഇത് സ്ത്രീകൾക്ക് ഏറെ സഹായകരമാകും.