കലാസൃഷ്ടികൾ വാങ്ങിക്കൂട്ടാന്‍ പണമൊഴുക്കി 'ജെന്‍-സി'; പഴയ തലമുറയെ ബഹുദൂരം പിന്നിലാക്കി പുത്തന്‍ തലമുറ

വിലപിടിപ്പുള്ള കലാസൃഷ്ടികൾ സ്വന്തമാക്കുന്നതിൽ പഴയ തലമുറയെക്കാൾ ബഹുദൂരം മുന്നിലാണ് ജെൻ-സി (Gen-Z) വിഭാഗമെന്ന് ആർട്ട് ബേസലും സ്വിസ് ബാങ്കായ യുബിഎസും (UBS) പുറത്തുവിട്ട പുതിയ റിപ്പോർട്ട്. കലാരൂപങ്ങൾക്കായി ഏറ്റവും കൂടുതൽ പണം ചെലവഴിക്കുന്നതും ഈ പുത്തൻ തലമുറയാണ്.

കഴിഞ്ഞ വർഷവും ഈ വർഷത്തിന്റെ ആദ്യ പകുതിയിലുമായി മുതിർന്ന തലമുറ ചെലവഴിച്ചതിന്റെ ഇരട്ടിയിലധികം തുകയാണ് യുവതലമുറ കലാരൂപങ്ങൾ വാങ്ങാൻ ഉപയോഗിച്ചത്. സർവേയിൽ പങ്കെടുത്ത ജെൻ-സി വിഭാഗത്തിലുള്ള ഒരാൾ ശരാശരി 3,47,000 ഡോളറാണ് ഇതിനായി ചെലവഴിച്ചത്.

തലമുറകളുടെ കണക്കുകൾ ഇങ്ങനെ:

ആദ്യ സ്ഥാനത്ത് ജെൻ-സി: ശരാശരി 3,47,000 ഡോളർ ചെലവഴിക്കുന്നു.

രണ്ടാം സ്ഥാനത്ത് ബേബി ബൂമേഴ്സ്: 62 മുതൽ 80 വരെ പ്രായമുള്ളവരാണ് ഇവർ.

മൂന്നാം സ്ഥാനത്ത് മില്ലേനിയലുകൾ: 30 മുതൽ 45 വയസ്സുവരെയുള്ളവർ തൊട്ടുപിന്നിലുണ്ട്.

ഏറ്റവും പിന്നിൽ ജെൻ-എക്സ്: 46 മുതൽ 61 വയസ്സുവരെയുള്ളവരാണ് കലാരൂപങ്ങൾക്കായി പണം ചെലവഴിക്കാൻ ഏറ്റവും മടികാണിച്ചത്. ഇവർ വെറും 79,000 ഡോളറാണ് ഇതിനായി മാറ്റിവെച്ചത്.

കുടുംബത്തിൽ നിന്നുള്ള സ്വാധീനമാണ് തന്നെ ഇതിലേക്ക് ആകർഷിച്ചതെന്ന് 40 ശതമാനം ജെൻ-സി ചെറുപ്പക്കാരും വ്യക്തമാക്കുന്നു. പഴയ തലമുറകളെ പോലെ തന്നെ, പുതിയ തലമുറയ്ക്കും പരമ്പരാഗത കലാസൃഷ്ടികളായ ചിത്രരചനകളോടും ശിൽപങ്ങളോടും തന്നെയാണ് കൂടുതൽ താൽപ്പര്യമെന്ന് യുബിഎസ് ഗ്ലോബൽ വെൽത്ത് മാനേജ്മെന്റ് ചൂണ്ടിക്കാട്ടുന്നു. തങ്ങൾ വാങ്ങുന്ന കലാസൃഷ്ടികൾ അത്യപൂർവ്വവും സവിശേഷതകളുള്ളതുമായിരിക്കണം എന്നാണ് സർവേയിൽ പങ്കെടുത്ത പകുതിയോളം പേരുടെയും ആഗ്രഹം.

റിയൽ എസ്റ്റേറ്റ്, സ്വകാര്യ ബിസിനസ് ആസ്തികൾ എന്നിവ ഒഴിവാക്കി, ഒരു മില്യൺ ഡോളറിനു മുകളിൽ ആസ്തിയുള്ള സമ്പന്നരായ വ്യക്തികളെ ഉൾപ്പെടുത്തിയാണ് 2026-ലെ ഈ സർവേ നടത്തിയത്. കൂടാതെ, കലാസൃഷ്ടികൾ വാങ്ങുന്നതിനുള്ള വിവരങ്ങൾ ശേഖരിക്കാൻ നിർമിത ബുദ്ധി (AI) ഉപയോഗിക്കുന്നവരുടെ എണ്ണത്തിലും വലിയ വർധനയുണ്ടായിട്ടുണ്ട്. 2024-ൽ 4 ശതമാനം പേർ മാത്രമാണ് എഐ ടൂളുകൾ ഉപയോഗിച്ചിരുന്നതെങ്കിൽ, ഇപ്പോൾ അത് 22 ശതമാനമായി ഉയർന്നു.