കൊച്ചി: പൊലീസിനും ജനപ്രതിനിധികൾക്കുമെതിരെ സൈബർ ഭീഷണിയും അധിക്ഷേപവും നടത്തിയ കേസിൽ അർജുൻ ആയങ്കിയെ കസ്റ്റഡിയിൽ വാങ്ങാൻ പൊലീസ് നീക്കം ശക്തമാക്കി. കസ്റ്റഡിയിൽ ലഭിച്ചാൽ കണ്ണൂർ സെൻട്രൽ ജയിലിൽ കഴിയുന്ന ആയങ്കിയെ ആദ്യം കൊച്ചിയിലെത്തിക്കും. കോതമംഗലം, ഊന്നുകൽ പൊലീസ് സ്റ്റേഷനുകളിൽ നിന്നുള്ള അന്വേഷണ സംഘം കസ്റ്റഡി അപേക്ഷ നൽകുന്നതിനായി കണ്ണൂരിലെത്തിയിട്ടുണ്ട്.
ഹൈക്കോടതി മുൻകൂർ ജാമ്യം തള്ളിയതിനെ തുടർന്ന് നിലവിൽ 14 ദിവസത്തേക്ക് റിമാൻഡിൽ കഴിയുന്ന ആയങ്കിക്കെതിരെ തലശ്ശേരി കോടതിയിലാണ് പൊലീസ് കസ്റ്റഡി അപേക്ഷ നൽകുക. സൈബർ ആക്രമണങ്ങൾ നടത്താൻ ഉപയോഗിച്ച മൊബൈൽ ഫോൺ കണ്ടെത്തുകയാണ് പൊലീസിന്റെ പ്രധാന ലക്ഷ്യം. കേസിൽ നിർണായക തെളിവായ ഫോൺ വീണ്ടെടുക്കുന്നതിനായി ആയങ്കി എറണാകുളം ജില്ലയിൽ തങ്ങിയ ഇടങ്ങളിൽ പൊലീസ് പരിശോധന വ്യാപിപ്പിച്ചു.
നേരത്തെ കോതമംഗലം പൊലീസ് കസ്റ്റഡിയിലെടുത്തതിന് പിന്നാലെയാണ് സർക്കിൾ ഇൻസ്പെക്ടർക്കും ഊന്നുകൽ എസ്.എച്ച്.ഒക്കും നേരെ ആയങ്കി വധഭീഷണിയും സമാനമായ വെല്ലുവിളികളും ഉയർത്തിയത്. പൊലീസിന്റെ ഔദ്യോഗിക കൃത്യനിർവഹണം തടസ്സപ്പെടുത്തുകയും വെല്ലുവിളിക്കുകയും ചെയ്ത സംഭവം അതീവ ഗുരുതരമാണെന്ന് നിരീക്ഷിച്ചാണ് ഹൈക്കോടതി ഇയാളുടെ ജാമ്യാപേക്ഷ തള്ളിയത്.
ജനപ്രതിനിധികൾക്കെതിരെയുള്ള സൈബർ അധിക്ഷേപത്തിൽ എറണാകുളം റൂറൽ പൊലീസും കേസെടുത്തിട്ടുണ്ട്. എറണാകുളം കേന്ദ്രീകരിച്ചാണ് ഭൂരിഭാഗം കുറ്റകൃത്യങ്ങളും നടന്നതെന്ന നിഗമനത്തിലാണ് ആയങ്കിയെ കൊച്ചിയിലെത്തിച്ച് തെളിവെടുപ്പ് നടത്താൻ പൊലീസ് തീരുമാനിച്ചിരിക്കുന്നത്.
