ന്യൂയോർക്ക്: 2026 ലോകകപ്പ് ഫൈനലിലെ തോൽവിക്ക് പിന്നാലെ സ്പാനിഷ് കളിക്കാരെ ആക്രമിച്ച സംഭവത്തിൽ അർജന്റീന താരങ്ങൾക്കെതിരെ ഫിഫ അന്വേഷണം പ്രഖ്യാപിച്ചു. മത്സരശേഷം ഗ്രൗണ്ടിലുണ്ടായ അക്രമസംഭവങ്ങളിൽ അർജന്റീനയുടെ പ്രതിരോധ താരം നാഹുവൽ മൊളീന, മിഡ്ഫീൽഡർ ലിയാന്ദ്രോ പാരെഡെസ്, മുൻ താരവും നിലവിലെ സഹപരിശീലകനുമായ ഫെബിയൻ അയാള എന്നിവർക്കെതിരെയാണ് ഫിഫ ഡിസിപ്ലിനറി കമ്മിറ്റിയുടെ നടപടി.
ഫിഫ ഡിസിപ്ലിനറി ആക്റ്റിലെ ആർട്ടിക്കിൾ 36 പ്രകാരമാണ് അന്വേഷണം നടത്തുന്നത്. കേസ് പഠിക്കാൻ പ്രത്യേക പ്രോസിക്യൂട്ടറെയും നിയമിച്ചിട്ടുണ്ട്. കുറ്റം തെളിയിക്കപ്പെട്ടാൽ താരങ്ങൾക്ക് വിലക്ക് ഉൾപ്പെടെയുള്ള കടുത്ത ശിക്ഷ നടപടികൾ നേരിടേണ്ടിവരും.
സംഭവിച്ചത് എന്ത്?
- മൊളീനയുടെ കൈയ്യേറ്റം: വിജയാഘോഷത്തിനിടയിൽ സ്പാനിഷ് ക്യാപ്റ്റൻ റോഡ്രി ഓടുമ്പോൾ അർജന്റീന താരം മൊളീന ഇടിച്ചതാണ് തർക്കങ്ങൾക്ക് തുടക്കമിട്ടത്.
- പാരെഡെസിന്റെ ആക്രമണം: സ്പാനിഷ് താരം എറിക് ഗാർഷ്യയുടെ കഴുത്തിന് പിടിച്ച പാരെഡെസ്, പിന്നീട് ഗാവിയെ തള്ളിയിടുകയും അദ്ദേഹത്തിന് നേരെ ബൂട്ട് എറിയുകയും ചെയ്തു. ഈ സംഭവത്തിൽ പാരെഡെസിന് റഫറി ചുവപ്പുകാർഡ് നൽകി.
- സഹപരിശീലകന്റെ ഇടപെടൽ: സ്പെയിന്റെ ഡാനി ഓൽമോയുടെ കഴുത്തിന് പിടിച്ചതിനാണ് സഹപരിശീലകൻ ഫെബിയൻ അയാളയ്ക്കെതിരെ അന്വേഷണം. ഇതിന്റെ ദൃശ്യങ്ങൾ പുറത്തുവന്നിട്ടുണ്ട്.
കുറിപ്പ്: നിശ്ചിത സമയത്തിന്റെ അവസാന മിനിറ്റുകളിൽ അർജന്റീന താരം എൻസോ ഫെർണാണ്ടസിനും റഫറി ചുവപ്പുകാർഡ് കാണിച്ചിരുന്നു.
സെമി ഫൈനലിലെ ബാനർ വിവാദവും അന്വേഷണത്തിൽ
ഇംഗ്ലണ്ടിനെതിരായ സെമി ഫൈനൽ ജയത്തിന് ശേഷം നടത്തിയ ആഘോഷവും ഫിഫയുടെ നിരീക്ഷണത്തിലാണ്. തർക്കഭൂമിയായ ഫോക്ക്ലാന്റ് ദ്വീപുകൾ അർജന്റീനയുടേതാണെന്ന് വ്യക്തമാക്കുന്ന ‘മാൽവിനാസ്’ ബാനറുമേന്തിയായിരുന്നു താരങ്ങളുടെ ആഘോഷം. ആരാധകർ സ്റ്റേഡിയത്തിൽ എത്തിച്ച ഈ ബാനർ ഉയർത്തിയതിലൂടെ ഫുട്ബോൾ ഗ്രൗണ്ടിൽ രാഷ്ട്രീയപരമായ സന്ദേശങ്ങൾ പ്രചരിപ്പിച്ചു എന്ന കുറ്റത്തിനാണ് ഫിഫ നടപടിയെടുക്കുന്നത്.
