തിരുവനന്തപുരം: ആഭ്യന്തര മന്ത്രിയെ ഭീഷണിപ്പെടുത്തിയെന്ന പരാതിയിൽ അറസ്റ്റിലായ ഗുണ്ടാ നേതാവ് അർജുൻ ആയങ്കിയെ കോടതി മൂന്ന് ദിവസത്തെ പൊലീസ് കസ്റ്റഡിയിൽ വിട്ടു. പ്രതിയെ ചോദ്യം ചെയ്യണമെന്ന പൊലീസിന്റെ ആവശ്യം തിരുവനന്തപുരം കോടതി അംഗീകരിക്കുകയായിരുന്നു.
“എല്ലാം ചെയ്തത് ഞാൻ തന്നെയാണ്, എല്ലാത്തിനും ഒരു കാരണമുണ്ട്” എന്ന് നെഞ്ചിലെ പച്ചകുത്തൽ ഉയർത്തിക്കാട്ടി കോടതിയിൽനിന്ന് പുറത്തിറങ്ങുമ്പോൾ അർജുൻ ആയങ്കി മാധ്യമങ്ങളോട് പ്രതികരിച്ചു.
കണ്ണൂർ സൈബർ ക്രൈം പൊലീസ് എടുത്ത കേസിലാണ് നിലവിലെ കസ്റ്റഡി. കുറ്റകൃത്യത്തിന് ഉപയോഗിച്ച ഐഫോൺ 16 പ്രോ കണ്ടെത്താൻ കസ്റ്റഡിയിൽ ചോദ്യം ചെയ്യേണ്ടതുണ്ടെന്ന് പൊലീസ് വ്യക്തമാക്കി.
അതേസമയം, കീഴടങ്ങുന്നതിനായി തളിപ്പറമ്പിൽനിന്നും കണ്ണൂരിലേക്ക് വരുമ്പോഴാണ് അർജുൻ പിടിയിലായതെന്ന് അഭിഭാഷക ഡെലീറ്റ ടൈറ്റസ് കോടതിയെ അറിയിച്ചു. ദേഹപരിശോധനവേളയിൽ കണ്ടെത്തിയ ഫോണിന്റെ വിവരങ്ങൾ പൊലീസ് റിപ്പോർട്ടിൽ ഉൾപ്പെടുത്തിയിട്ടില്ലെന്നും പ്രതിഭാഗം ആരോപിച്ചു.
അതിനിടെ, സംഘടിത കുറ്റകൃത്യത്തിന് ഗൂഢാലോചന നടത്തിയെന്ന കേസിൽ അർജുൻ ആയങ്കിയുടെ ജാമ്യം കോതമംഗലം മജിസ്ട്രേറ്റ് കോടതി റദ്ദാക്കി. പൊലീസ് നൽകിയ റിപ്പോർട്ടിന്റെ അടിസ്ഥാനത്തിലാണ് നടപടി
