സ്വർണവിലയിൽ കനത്ത ഇടിവ്; പവന് 1,040 രൂപ കുറഞ്ഞു
കൊച്ചി: സംസ്ഥാനത്ത് സ്വർണവിലയിൽ വീണ്ടും വൻ കുറവ് രേഖപ്പെടുത്തി. ഒരു പവൻ സ്വർണത്തിന് 1,040 രൂപയാണ് ഇന്ന് കുറഞ്ഞത്. ഇതോടെ വിപണിയിൽ ഒരു പവൻ സ്വർണത്തിന്റെ വില 1,04,800 രൂപയായി താഴ്ന്നു. ഗ്രാമിന് 130 രൂപ കുറഞ്ഞ് 13,100 രൂപ എന്ന നിരക്കിലാണ് നിലവിൽ വ്യാപാരം പുരോഗമിക്കുന്നത്.
ആഗോള അനിശ്ചിതത്വം: ആഗോളതലത്തിലെ സാമ്പത്തിക-രാഷ്ട്രീയ മാറ്റങ്ങളാണ് നിലവിൽ സ്വർണവിലയെ സ്വാധീനിക്കുന്നത്. പ്രത്യേകിച്ച്, അമേരിക്ക–ഇറാൻ സംഘർഷം രൂക്ഷമായതിനെ തുടർന്ന് അസംസ്കൃത എണ്ണവിലയിലുണ്ടായ ചാഞ്ചാട്ടം വിപണിയിൽ വലിയ അനിശ്ചിതത്വം സൃഷ്ടിച്ചിട്ടുണ്ട്.
പലിശനിരക്ക് ഉയരാനുള്ള സാധ്യത: എണ്ണവില വർധിക്കുന്നത് ആഗോളതലത്തിൽ വിലക്കയറ്റത്തിന് കാരണമാകുമെന്ന ആശങ്ക ശക്തമാണ്. ഇത് മുൻനിർത്തി യുഎസ് ഫെഡറൽ റിസർവ് പലിശനിരക്ക് ഉയർത്തിയേക്കുമെന്ന വിലയിരുത്തലുകൾ സജീവമാണ്. പലിശനിരക്ക് ഉയർന്നാൽ സുരക്ഷിത നിക്ഷേപമെന്ന നിലയിൽ സ്വർണത്തിനുള്ള ആകർഷണം കുറയാൻ സാധ്യതയുണ്ടെന്ന് വിദഗ്ധർ ചൂണ്ടിക്കാട്ടുന്നു.
ശക്തമാകുന്ന ഡോളർ: രാജ്യാന്തര വിപണിയിൽ ഡോളറിന്റെ മൂല്യം ശക്തിപ്പെടുന്നതും സ്വർണവിലയ്ക്ക് മേൽ കടുത്ത സമ്മർദം ചെലുത്തുന്നുണ്ട്.
